Panjim News : मद्यधुंद अवस्थेत पोहण्याचा मोह अंगलट, पणजी जिमखान्याच्या मागे एकाचा बुडून मृत्यू

Panjim News : पणजी जिमखान्याच्या मागील जॉगींग ट्रकच्या परिसरात एका व्यक्तीचा बुडून मृत्यु झाल्याची घटना घडली आहे. ही घटना आज सायंकाळी 6 वाजण्याच्या सुमारास घडली.

108 ला संपर्क करुन वैद्यकीय मदत मागविण्यात आली. दरम्यान, व्यक्ती मृत झाल्याचे डॉक्टरांनी सांगितले.

जॉगींग ट्रकच्या परिसरात मित्रासोबत हा व्यक्ती मद्यप्राशन करत होता असे तेथील प्रत्यक्षदर्शींनी सांगितले. मद्यधुंद अवस्थेत पोहत असल्याने त्याचा बुडून मृत्यू झाल्याचा अंदाज व्यक्त केला जात आहे.

याबाबत अधिक माहिती अशी की, मृत युवकाचे नाव मजीब (रा. मडगाव) (पूर्ण नाव समजू शकले नाही) असे आहे.

हा युवक आपल्या मित्राला भेटण्यासाठी पणजी जिमखान्याच्या मागील जॉगींग ट्रकच्या परिसरात आला होता. मित्रासोबत भेट झाल्यानंतर येथील मांडवी खाडीत पोहण्याचा मोह त्याला आवरता आला नाही.

मजीब हा पोहण्यास उतरला. मात्र, काही कालावधीनंतर पोहताना तो पाण्यात बुडू लागला. तो बुडत असल्याचे लक्षात येताच त्याच्या मित्राने पाण्यात उडी घेत मजीबला बाहेर काढले. मात्र तोपर्यंत त्याचा मृत्यु झाला होता. पणजी पोलिसांना घडलेल्या घटनेची माहिती देण्यात आली आहे.

जॉगिंग ट्रॅक की तळीरामांचा अड्डा ?

पणजी जिमखान्याचा मागील परिसर हा तळीरामांचा अड्डा बनल्याचे चित्र वारंवार दिसून आले आहे. या ठिकाणी रात्री आणि दिवसाढवळ्या काही व्यक्ती मद्यप्राशन करत असतात. त्यामुळे असे प्रकार घडतात.

राज्यात उघड्यावर मद्य प्राशन करण्यास बंदी आहे मात्र, नियम फक्त कागदावरच असल्याचे दिसून येते. असे अपघाताचे प्रकार रोखण्यासाठी याठिकाणी जॉगिंग ट्रॅक परिसरात बॅरिकेटींग करावे व पोलिसांनी गस्त घालावी अशी मागणी यावेळी स्थानिकांनी केली आहे.