Parra Crime: मारहाण करत जीवे घेण्याची दिली धमकी, कार-मोबाईलची नासधूस; पूर्ववैमनस्यातून राडा, दोघांना अटक

म्हापसा: माडानी, पर्रा येथे पूर्ववैमनस्यातून तिघांना मारहाण करण्यात आली. याप्रकरणी म्हापसा पोलिसांनी सहाजणांपैकी दोन संशयितांना अटक केली आहे.

अटक केलेल्या संशयितांमध्ये दत्ताराम हरमलकर व केन्रीक रॉिड्रग्ज (रा. साळगाव) यांचा समावेश आहे. तर संशयित रौनक कोरगावकर व इतर अज्ञात तिघेजण फरार असून त्यांचा शोध पोलिस घेत आहेत. या मारहाणीमध्ये अब्दूल मुनाफ मकंदर, सोहल गौस खान इमानदार व मिथून संजी राठोड (रा. गिरी) हे तिघेही जखमी झाले.

ही हाणामारीची घटना दोन गटात, बुधवारी दुपारी २.४० च्या सुमारास घडली होती. याबाबत गुरूवारी सायंकाळी फिर्यादी अब्दूल मकंदर (रा. मोंते गिरी) याने पोलिसांत तक्रार दाखल केली. फिर्यादी आपल्या दोघा मित्रांसमवेत घटनास्थळी होता. त्यावेळी सहाजणांनी या तिघांवर हल्ला चढवला. तसेच जीवे मारण्याची धमकी देत कारगाडी व मोबाईल फोनची नासधूस केली.

याप्रकरणी पोलिसांनी गुन्हा नोंदवत दोघा संशयितांना अटक केली तर इतरांचा शोध सुरू आहे. पुढील तपास पोलिस उपनिरीक्षक यशवंत मांद्रेकर हे करत आहेत.