Birch Club Case: 'बर्च' क्लबच्या बनावट NOC प्रकरणात लुथरा बंधूंच्या जामिनावर पुन्हा सुनावणी; 2300 पानी दोषारोपपत्रामुळे प्रकरण गंभीर

म्हापसा: ‘बर्च’ क्लबसाठी दारूविक्रीचा परवाना मिळविण्यासाठी आरोग्य खात्याचे बनावट ना-हरकत प्रमाणपत्र (एनओसी) सादर केल्याप्रकरणी संशयित आरोपी सौरभ लुथरा आणि गौरव लुथरा यांच्या जामीन अर्जावर सोमवारी म्हापसा प्रथम वर्ग न्यायदंडाधिकारी न्यायालयात सुनावणी झाली. न्यायालयाने सुनावणी तहकूब केली असून, मंगळवारी (ता. ६) जामीन अर्जावर पुढील युक्तिवाद होणार आहे.

या प्रकरणातील आणखी एक संशयित आरोपी अजय गुप्ता यानेही न्यायालयात जामिनासाठी अर्ज दाखल केला आहे. त्यावर सरकारी पक्षाचे म्हणणे आणि अंतिम युक्तिवादासाठी न्यायालयाने १३ ऑक्टोबर ही तारीख निश्चित केली आहे. सोमवारी सौरभ, गौरव आणि अजय या तिघांनाही कोलवाळ कारागृहातून न्यायालयात हजर करण्यात आले.

आगीच्या दुर्घटनेनंतर तक्रार

डिसेंबर २०२५ मध्ये ‘बर्च बाय रोमिओ लेन’ या रेस्टॉरंट-क्लबला लागलेल्या भीषण आगीत २५ पर्यटक आणि कर्मचाऱ्यांचा होरपळून मृत्यू झाला होता. या दुर्घटनेनंतर कांदोळी प्राथमिक आरोग्य केंद्राच्या आरोग्य अधिकाऱ्यांनी म्हापसा पोलिसांत स्वतंत्र तक्रार दाखल केली होती.

क्लबचे संचालन करणाऱ्या एलएलपी कंपनीच्या संचालकांनी अबकारी खात्याकडून दारूविक्रीचा परवाना मिळविण्यासाठी आरोग्य विभागाचे बनावट ना-हरकत प्रमाणपत्र तयार केल्याचे या तक्रारीत नमूद करण्यात आले होते.

२३०० पानी दोषारोपपत्र

या तक्रारीच्या आधारे म्हापसा पोलिसांनी संशयितांविरोधात भारतीय न्याय संहितेच्या कलम ३३६(२), ३३६(३), ३३८, ३४०(२), ३१८(४) आणि ३(५) अन्वये गुन्हा नोंदवला होता. पोलिसांनी या प्रकरणात सुमारे २,३०० पानांचे दोषारोपपत्र म्हापसा न्यायालयात दाखल केले आहे. क्लबचे मालक सौरभ लुथरा आणि गौरव लुथरा यांच्यासह दिनेश खेरा, अजय गुप्ता आणि अबकारी खात्याचे अधिकारी गौरेश गावस अशा पाच जणांना आरोपी करण्यात आले आहे.