तरुणाच्या 'त्या' कृतीने उडवली प्रशासनाची झोप, फोंडा पोलिस स्टेशनसमोर लटकणाऱ्या विजेच्या धोकादायक तारेमुळे संताप

फोंडा: फोंडा पोलिस स्टेशनसमोर जवळपास तीन आठवड्यांपासून (20-22 दिवस) एक विजेची तार धोकादायकपणे लटकत असल्याचे वृत्त समोर आले आहे. इतक्या गंभीर सुरक्षेच्या धोक्याकडे स्थानिक प्रशासन आणि पोलिसांकडून दुर्लक्ष झाल्याने नागरिकांमध्ये संतापाची लाट उसळली आहे. या निष्काळजीपणामुळे जनतेच्या सुरक्षेवर प्रश्नचिन्ह निर्माण झाले आहे.

दरम्यान, या धोकादायक स्थितीकडे दुर्लक्ष केले जात असतानाच नुकत्याच घडलेल्या एका अस्वस्थ करणाऱ्या घटनेने वातावरण अधिकच गंभीर बनले. एका व्यक्तीने पोलिस स्टेशनच्या बाहेर लटकणाऱ्या विजेच्या तारेला स्वतःच्या गळ्याभोवती गुंडाळण्याचा प्रयत्न केला. अचानक घडलेल्या या घटनेने उपस्थित नागरिकांमध्ये गोंधळ उडवला आणि काही काळासाठी भीतीचे वातावरण निर्माण झाले.

घटनास्थळी जमलेल्या नागरिकांनी तात्काळ हस्तक्षेप करुन सदर व्यक्तीला रोखले, मात्र या प्रकारामुळे स्थानिक प्रशासनाच्या भूमिकेवर प्रश्नचिन्ह उपस्थित केले जात आहे. पोलिस स्टेशनसारख्या अतिमहत्त्वाच्या ठिकाणी जर 20 दिवसांपेक्षा अधिक काळ धोकादायक स्थिती कायम राहू शकते, तर सामान्य ठिकाणांची काय अवस्था?" असा सवाल नागरिकांकडून उपस्थित केला जात आहे.

दुसरीकडे, याप्रकरणी स्थानिकांनी वीज खात्याकडे तक्रार दिली असली तरी अद्याप कोणतीही ठोस कारवाई झालेली नाही. पोलिस (Police) आणि संबंधित अधिकाऱ्यांच्या या दुर्लक्षामुळे स्थानिकांमध्ये असंतोष आहे. नागरिकांनी या धोकादायक स्थितीकडे तात्काळ लक्ष देण्याची आणि योग्य ती कारवाई करण्याची मागणी केली आहे. संपूर्ण प्रकरणाकडे प्रशासन गांभीर्याने पाहते का? दोषींवर कारवाई होते का? हे पाहणे महत्त्वाचे ठरेल. दरम्यान, अधिकाऱ्यांच्या निष्क्रियतेवर संतप्त नागरिकांनी आंदोलनाचा इशारा दिला आहे.