'कुजिरा'ची 'पार्टी स्पॉट'कडे वाटचाल, रस्त्यांवर कचऱ्याचे ढीग; रात्री पार्ट्यांचा उपद्रव, सुरक्षा यंत्रणा निष्क्रिय

पणजी: कुजिरा (बांबोळी) येथील शैक्षणिक संकुल परिसरातील रस्ते म्हणजे पार्टीची ठिकाणे बनू लागली आहेत. याशिवाय येथील स्वच्छतेकडे अजिबात लक्ष दिले जात नसून, स्टेडियमच्या बाजूने भिंतीवर लावलेली भित्तिचित्रेही निखळून पडलेली आहेत. त्याकडे संबंधितांना पाहण्यासही वेळ नसल्याचे दिसून येते.

पणजी शहरात शाळा असताना दररोज होणारी वाहतूक कोंडी सोडवण्यासाठी शैक्षणिक संकुल शहराबाहेर नेण्याचा निर्णय झाला. बांबोळी येथील कुजिरा शाळा संकुल जून २०१५ पासून कार्यान्वित झाले.

राज्य सरकारने दीर्घकालीन भाडेपट्टीवर (लिजवर) सहा शाळांना जागा वाटप केले. त्यात मुष्टिफंड संस्था, पणजी, डॉ. के. बी. हेडगेवार हायस्कूल (मळा-पणजी), रोझरी हायस्कूल (मिरामार), व्ही. धेंपो उच्च माध्यमिक कला व विज्ञान विद्यालय (मिरामार), व्ही. धेंपो उच्च माध्यमिक वाणिज्य विद्यालय (मिरामार) आणि अंजुमन नुरुल इस्लाम हायस्कूल (पणजी) यांचा समावेश आहे.

या सर्व शाळांच्या समोरून आणि येथील ॲथलेटिक्स स्टेडियमच्या बाजूने सिमेंट काँक्रिटचा रस्ता तयार केला गेला आहे. काँक्रिट रस्ता केला गेला; पण त्याची नियतमितपणे स्वच्छता काही होत नाही. दररोज हजारो वाहने याठिकाणी मुलांना ने-आण करण्यासाठी ये-जा करीत असतात.

परंतु शाळा किंवा कॉलेज सुटल्यानंतर रात्री या संकुलाच्या समोरील रस्त्यावर पार्टी करण्यासाठी लोक येतात, असे दिसते; कारण रस्त्याच्या बाजूने बिअरच्या बाटल्या, टीन, ग्लासेस पार्टी करणारे टाकून निघून जातात, असे चित्र आहे. त्याशिवाय खाण्यासाठी आणलेल्या पत्रावळीही रस्त्यावर विस्कटलेल्या दिसत असल्याने याठिकाणाचा पार्टीसाठी वापर होतो, हे स्पष्ट होते.

उशिरापर्यंत वाहने उभी!

संकुल परिसरातील या मार्गावर प्रवेशद्वार बनवण्याचे काम करण्यात आले आहे; पण या गेटसाठी सुरक्षारक्षक नेमले गेले नाहीत, त्यामुळे हा परिसर म्हणजे ‘आओ जाओ घर तुम्हारा’ असाच बनलेला आहे.

त्याशिवाय स्टेडियमच्या पूर्वेकडील बाजूनेही काँक्रिटचाच रस्ता आहे. याठिकाणी स्कूल बसेस, कदंब बसेस उभ्या केल्या जातात. याही परिसरात सायंकाळनंतर उशिरापर्यंत चारचाकी वाहने उभी राहत असल्याच्या तक्रारी आहेत.