Mhadei Water Dispute: कर्नाटककडून पाणी वळविण्याचे काम पुन्हा सुरू, प्रमोद सावंतांना म्हादईपेक्षा खुर्चीची जास्त चिंता; युरी आलेमाव

Mhadei Water Dispute Kalasa-Banduri Nala project

पणजी: म्हादईच्या रक्षणासाठी कर्नाटकविरोधात लढण्यास भाजपचे नेते आणि मुख्यमंत्री प्रमोद सावंत असमर्थ ठरले आहेत, त्यामुळे शेजारील राज्य पाणी वळविण्याचा प्रयत्न करत आहे, अशी टीका विरोधी पक्षनेते युरी आलेमाव यांनी शुक्रवारी (०४ ऑक्टोबर) केली.

कर्नाटक नीरवरू निगम लिमिटेडने खानापूरमधील नेरसे गावात काम सुरू केल्याचे, या कृत्यांवर बारकाईने लक्ष ठेवणारे नामवंत पर्यावरणवादी आणि अभ्यासक राजेंद्र केरकर यांच्या निदर्शनास आले आहे, मात्र गोवा सरकारचे या गोष्टींकडे लक्ष नाही. ते निष्क्रिय झाले आहे असे आलेमाव म्हणाले.

कनार्टकच्या प्रयत्नांवर पर्यावरणप्रेमी आणि गोमंतकियांनी चिंता व्यक्त केली आहे. पण सरकार आणि मुख्यमंत्री प्रमोद सावंत यांना कर्नाटकच्या कारवायांची पर्वा नाही, त्यांनी कर्नाटकला हवे ते करण्याची मोकळीक दिली आहे असे आलेमाव म्हणाले.

कर्नाटककडे काम सुरू करण्यासाठी कोणत्याही सक्तीच्या परवानग्या नाहीत. नेरसे येथे त्यांनी सर्वेक्षण पूर्ण केले आहे. त्यांना राष्ट्रीय वन्यजीव मंडळाची परवानगी नाही, तरीही ते नियमांचे उल्लंघन करत आहेत असे आलेमाव म्हणाले.

'केंद्रीय गृहमंत्री अमित शहा यांनी गोवा आणि कर्नाटक यांच्यातील प्रदीर्घ वाद मिटला असून त्यांना नदी वळवण्याची परवानगी दिली आहे, असे म्हटले होते. हे आता खरे ठरले असून यामुळे मुख्यमंत्री प्रमोद सावंत म्हादईच्या रक्षणासाठी काहीच करत नाहीत. म्हादईच्या रक्षणापेक्षा आपले पद वाचवण्याची त्यांना जास्त चिंता आहे,' अशी टीका आलेमाव यांनी केली.

'प्रमोद सावंत नेहमीच 'भिवपाची गरज ना' असे म्हणतात. पण आता काळजी करण्याची गरज आहे. या परिस्थितीला मंत्री सुभाष शिरोडकर हेही तितकेच जबाबदार आहेत, कारण ते अपयशी ठरले आहेत.'

'गोवा सरकार कर्नाटक विरोधात अवमान याचिका दाखल करणार का? भाजपने राजकीय फायद्यासाठी म्हादई कर्नाटकला विकली. मुख्यमंत्री प्रमोद सावंत म्हादईबाबत गंभीर नसून केवळ जनतेची दिशाभूल करतात, हे वेळोवेळी सिद्ध झाले आहे,' असे आलेमाव म्हणाले.