कुठ्ठाळीत स्थलांतरीतांना हवाय कन्नड आमदार?? कन्नड महासंघाची मंत्री मॉविन गुदिन्हो यांच्याकडे मागणी

पणजी: गोव्यात प्रत्येक मतदारसंघात कन्नड मतदार असल्याचा दावा करणाऱ्या सिद्धन्ना मेटी यांनी राज्यातून कन्नड आमदारही निवडून आणण्याचा चंग बांधल्याचे दिसत आहे. कुठ्ठाळीत स्थलांतरीतांची संख्या अधिक असून, त्यांचे प्रतिनिधित्व कन्नड आमदाराने करावे अशी इच्छा त्यांनी बोलून दाखवली आहे. एवढेच नव्हे येथे कन्नड उमेदवार देण्याची मागणीही गोवा कन्नड महासंघाने मंत्री मॉविन गुदिन्हो यांच्याकडे केलीय.

झुवारीनगर येथे स्थलांतरीतांची संख्या अधिक आहे. यात कन्नड नागरीक बहुसंख्य आहेत. त्यामुळे येत्या निवडणुकीत कुठ्ठाळीत कन्नड नेत्याला उमेदवारी देण्यात यावी, अशी मागणी गोवा कन्नड महासंघाने पंचायत मंत्री मॉविन यांच्याकडे केली आहे.

परप्रांतीय उमेदवाराचा मंत्री गुदिन्हो विचार करतील, असा विश्वासही मेटी यांनी व्यक्त केला आहे. कन्नड नागरिकांचे योगदान आणि त्यांची संख्या याचा विचार करण्यात यावा आणि त्यांचे प्रतिनिधित्व करण्यासाठी आमच्या समुदायातील उमेदवार देण्यात यावा, असे मत त्यांनी मांडले आहे.

मेटी यांनी गोव्यातील प्रत्येक मतदारसंघात कन्नड मतदार असल्याचा दावा केला आहे. “दोन हजार ते २५ हजार पर्यंत मतदार प्रत्येक मतदार संघात असल्याचे मेटी म्हणाले. त्यामुळे सर्वांनी आपण भाऊ – बहीण असल्याचा विचार करुन एकत्र काम करायला हवं आणि प्रेमाने एकत्र राहायला हवं”, असे मेटी म्हणाले.

“आम्ही प्रत्येक मतदारसंघात मतदान केले आहे, मुख्यमंत्री विजयातही आमचे योगदान आहे”, असे मेटी म्हणाले.

“कोणीतरी सरपंच झाले तर त्याचे अभिनंदन करायला हवं. आम्ही तुमच्यासाठी मतदान केलं आहे. कोणीतरी सरपंच झाले तर आम्हाला घाटी – घाटी किंवा लमाणी म्हणून हिणवलं जातं, असं बोलण्याची गरज नाही. येत्या जिल्हा परिषदेच्या निवडणुकीत आमचे प्रतिनिधीत्व करणारा उमेदवार विजयी होईल. आमचा आमदारही विजयी होईल”, असे मेटी म्हणाले.

दरम्यान, मेटी यांनी यावेळी रिव्हॉल्युशनरी गोवन्स पक्षाचे अध्यक्ष मनोज परब यांच्यावर निशाणा साधत त्यांच नाव देखील घेण्याची लाज वाटत असल्याचे मत व्यक्त केले. तसेच, परब यांनी वारंवार घाटी - घाटी म्हणून आम्हाला हिणवू नये, शेजारी राज्य भावासारखी आहेत. सर्वांनी प्रेमाने राहायला हवं. लोक पोट भरण्यासाठी येथे आलेत चोरी करण्यासाठी नाही, असे मेटी यावेळी म्हणाले.