गोव्यातील मंत्री नेत्यांच्या तोफा कर्नाटकात धडाडणार, CM सावंत, राणे, लोबो यांच्यासह 'या' नेत्यांवर मोठी जबाबदारी

देशभरात सत्ता प्रस्थापित करण्यासाठी भाजप प्रयत्नशील असून आगामी कर्नाटकातील विधानसभा निवडणुकीसाठी पक्षाने विशेष रणनीती आखायला सुरुवात केली आहे. यासाठी राष्ट्रीय अध्यक्ष जे. पी. नड्डा यांनी पक्षीय जबाबदाऱ्या जाहीर केल्या आहेत. गोवा राज्यातील काही नेत्यांवर निवडणूक प्रचाराची जबाबदारी देण्यात आल्याची माहिती प्राप्त होतेय.

गोव्याचे मुख्यमंत्री प्रमोद सावंत हे भाजपचे स्टार प्रचारक असणार आहेत तर आरोग्य मंत्री विश्‍वजित राणे यांच्यासह सार्वजनिक बांधकाम मंत्री निलेश काब्राल, वाहतूक मंत्री माविन गुदिन्हो, जलस्रोत मंत्री सुभाष शिरोडकर हेही प्रचारासाठी जाणार असल्याची माहिती सूत्रांनी दिली.

मुख्यमंत्री प्रमोद सावंत हे निवडणुकीसाठी स्टार प्रचारक आहेत. सावंत यांच्यावर साखळी नगरपालिकेच्या निवडणूक कार्यक्रममध्येही लक्ष घालावे लागणार असल्याने कर्नाटकातील प्रचाराच्या तारखा आणि वेळही त्यांच्या सोयीनेच ठरविली जाईल, असे सूत्रांनी सांगितले.

विश्‍वजीत राणे यांच्यावर उत्तर कन्नड जिल्ह्यातील सहा मतदारसंघांची जबाबदारी त्यांच्यावर आहे. 11 एप्रिल पासून ते मतदान होईपर्यंत स्थानिक नेतेमंडळींना सोबत घेऊन प्रचाराचे पूर्ण नियोजन करण्याची जबाबदारी राणे यांच्यावर आहे.