Goa CM: देशभरात शेतकऱ्यांना भडकविण्याचे काम इंडिया आघाडी करतेय; मुख्यमंत्री प्रमोद सावंत

देशभरात शेतकऱ्यांना भडकविण्याचे काम इंडिया आघाडी करतेय, असा आसा आरोप गोव्याचे मुख्यमंत्री डॉ. प्रमोद सावंत यांनी केला. पावसाळी अधिवेशनाच्या अकराव्या दिवशी (२९ जुलै) शेतकऱ्यांना नुकसान भरपाई देण्याबाबत भाजप सरकार सकारात्मक असल्याचे सावंत यांनी सांगताना इंडिया आघाडीवर टीका केली.

विरोधी पक्षनेते युरी आलेमाव यांनी मुख्यमंत्र्यांच्या वक्तव्यावर आक्षेप घेतल्याने गोंधळात सभापतींने सभागृहाचे कामकाज तहकूब केले.

"हे सरकार शेतकऱ्यांप्रती संवेदनशील आहे, त्यांना देणारे हे सरकार आहे. त्यांना भडकविण्याचे काम तुम्ही करु नका. देशभरात शेतकऱ्यांना भडकविण्याचे काम इंडिया आघाडी करत आहे", अशी टीका मुख्यमंत्री डॉ. प्रमोद सावंत यांनी केली.

विरोधी पक्षनेते आलेमाव यांनी सावंत यांच्या वक्तव्यावर आक्षेप घेताना मुख्यमंत्री विषयांतर करुन लाडू देत आहेत. काँग्रेस नेते राहुल गांधी यांनी भारत जोडो यात्रेच्या माध्यमातून देशभर फिरत शेतकरी आणि सामान्य लोकांच्या व्यथा जाणून घेतल्या, असे आलेमाव म्हणाले.

गेल्या पंधरा दिवसांत झालेल्या पावसामुळे फार्मागुढी, बांदोडा, फोंडा आणि केपे तालुक्यातील शेतकऱ्यांची नुकसान झाली. या शेतकऱ्यांना नुकसान भरपाई देण्याची मागणी करणार लक्षवेधी मांडली.

या शेतकऱ्यांचे सर्वेक्षण करुन गणेश चतुर्थीपूर्वी नुकसान भरपाई देण्याची घोषणा केली. मुख्यमंत्री रिलीफ फंडातून देखील त्यांना काही मदत देता येईल का किंवा येत्या काळात या शेतकऱ्यांसाठी काही ठोस योजना तयार करता येईल का याचा देखील विचार केला जाईल, अशी ग्वाही मुख्यमंत्री डॉ. सावंत यांनी सभागृहात दिली.

गेल्या वर्षीच्या काही शेतकऱ्यांना अद्याप नुकसान भरपाई मिळाली नसल्याचे विरोधी पक्षनेते आलेमाव यांनी मुख्यमंत्री सावंत यांच्या निदर्शनास आणून दिले. अर्ज केलेल्या उर्वरित शेतकऱ्यांना देखील अधिवेशन संपण्यापूर्वी नुकसान भरपाई मिळेल, असे आश्वासन मुख्यमंत्री डॉ. सावंत यांनी सभागृहात दिले.