अखेर गोविंद गावडेंच्या हाती भाजपचा भगवा झेंडा

पणजी : अपक्ष आमदार आणि गोव्याचे सांस्कृतिक मंत्री गोविंद गावडेंनी अखेर भाजपमध्ये प्रवेश केला आहे. भाजपचे गोवा प्रभारी देवेंद्र फडणवीस, गोवा भाजप प्रदेशाध्यक्ष सदानंद शेट तानावडे, गोवा राज्याचे मुख्यमंत्री डॉ. प्रमोद सावंत यांच्या उपस्थितीत गोविंद गावडेंनी भाजपमध्ये प्रवेश केला आहे. गोविंद गावडेंसह त्यांच्या कार्यकर्त्यांनीही भाजपमध्ये प्रवेश केला आहे. (Govind Gaude Enters BJP News Update)

माझ्या प्रवेशामुळे भाजपमध्ये (BJP) नाराजी आहे. मात्र ती नाराजी दूर करण्याचा प्रयत्न करणार आहे. तसंच भाजप पक्षश्रेष्ठींनी दाखवलेला विश्वास सार्थ ठरणार असल्याचं गोविंद गावडेंनी भाजपमध्ये प्रवेश केल्यानंतर स्पष्ट केलं. तसंच भाजपने दिलेल्या सन्मानासाठी आपण त्यांचे आभार मानत असल्याचं त्यांनी सांगितलं. येत्या काळात विविध योजनांच्या माध्यमातून भाजप गोमंतकीय जनतेची सेवा करणार असल्याचंही गावडेंनी स्पष्ट केलं.

आपल्या प्रियोळ (Priol) मतदारसंघात माझ्या भाजपप्रवेशामुळे आणि उमेदवारीमुळे नाराज झाले असतील, मात्र सर्वांनी एकत्र काम करण्याची गरज असल्याची गोविंद गावडेंनी सांगितलं. तसेच आगामी विधानसभा निवडणुकीत भाजपचा विजय होईल आणि आपलं सरकार स्थापन होईल असा विश्वासही त्यांनी व्यक्त केला.

यावेळी मुख्यमंत्री डॉ. प्रमोद सावंत (Pramod Sawant) यांनी गोविंद गावडे आणि त्यांच्या कार्यकर्त्यांचं भाजपमध्ये स्वागत केलं आणि शुभेच्छाही दिल्या. गेल्या 5 वर्षांमध्ये गोविंद गावडेंनी राज्यात चांगलं काम केलं आहे. आता पंतप्रधान नरेंद्र मोदींच्या नेतृत्त्वात नवभारत निर्माण करण्यासाठी प्रयत्न करणार असल्याचंही मुख्यमंत्री म्हणाले.