साखळीत अत्याधुनिक कदंब बसस्थानकाचे उदघाटन

साखळी: साखळीचा मास्टर प्लान डोळ्यांसमोर ठेवून नागरिकांनी केलेल्या सहकार्यामुळेच साखळीत असंख्य विकासकामे राबवली. स्वच्छ व सुंदर साखळी, हेच माझे ध्येय आहे, असे उदगार मुख्यमंत्री डॉ. प्रमोद सावंत यांनी काढले.

साखळी (Sanquelim) येथील नवीन अत्याधुनिक कदंब बसस्थानकाचे (Kadamba Bus Stand) उदघाटन केल्यानंतर मुख्यमंत्री (CM Pramod Sawant) बोलत होते. यावेळी जिल्हा पंचायत सदस्य गोपाळ सुर्लकर, कदंब महामंडळाचे चेअरमन दीपक नाईक, साधनसुविधा विकास महामंडळाचे संचालक दत्ताराम चिमुलकर, नगरसेवक आनंद काणेकर, दयानंद बोर्येकर, भीमराव देसाई आदी मान्यवर उपस्थित होते.

यावेळी सावंत म्हणाले, साखळीच्या सरकारी उच्च माध्यमिक विद्यालयाची इमारत मोडकळीस आली होती. तिची दुरुस्ती करण्यात आली. सरकारी महाविद्यालयाच्या इमारतीचा विस्तार करून दर्जा वाढविण्यात आला. गेली 15 वर्षे रेंगाळत पडलेले साखळीचे मलनिस्सारण प्रकल्प कार्यान्वित केले. गृहनिर्माण वसाहतीमध्ये राखीव जागेत नवीन सभागृह तसेच वन खात्यातर्फे उपवन विभाग निर्माण करून औषधी झाडे लावली. बालोद्यान उभारले, अशी माहिती सावंत यांनी दिली. आनंद काणेकर यांनी स्वागत केले, तर सिध्दी पोरोब यांनी आभार मानले.

पाचशे विद्यार्थ्यांना रोजगार उपलब्ध

साखळी येथील साई नर्सिंग इन्स्टिट्यूटच्या स्वतंत्र इमारतीचे काम सुरू आहे. या इन्स्टिट्यूटमधून पाचशे विद्यार्थी उत्तीर्ण होऊन त्यांना रोजगार लाभला आहे. साखळी पालिकेतर्फे जी विकासकामे केली जातात, त्यालाही शंभर टक्के विकासनिधी सरकारतर्फे पुरवला जातो. होंडा जंक्शन ते साखळी हॉस्पिटल जंक्शनचे रुंदीकरण व विद्युत रोषणाईने सुशोभीकरण लवकरच करण्यात येईल, असे सावंत यांनी यावेळी सांगितले.