Agonda Panchayat: आगोंदमध्‍ये होतोय अशुद्ध पाण्‍याचा पुरवठा!

आगोंद येथील काही भागात काही पाण्यांच्या टाक्यांमधून पिण्यायोग्य पाणी वितरित होत नसल्याचा अहवाल काणकोण सामाजिक इस्पितळातर्फे पोलिस व सार्वजनिक बांधकाम खात्याच्या पाणीपुरवठा विभागाला सादर करण्‍यात आल्‍यामुळे या भागात खळबळ माजली आहे.

मात्र, आगोंद पंचायतीला यासंबंधीची प्रत मिळालेली नाही. दरम्‍यान, येथील जनतेच्या आरोग्याच्या दृष्टीने ही चिंताजनक बाब असून तातडीने पावले उचलावीत अशी मागणी होऊ लागली आहे.

काँग्रेसचे नेते जनार्दन भंडारी यांनी याप्रकरणी आक्रमक पवित्रा घेऊन पाणीपुरवठा विभागाच्या अधिकाऱ्यांविरोधात काणकोण पोलिसांत तक्रार दाखल केली होती. या तक्रारीची दखल घेऊन पाणीपुरवठा विभाग व काणकोण सामाजिक इस्पितळाला आगोंद येथील पाण्याच्या शुद्धतेबाबत अहवाल सादर करण्याची सूचना काणकोण पोलिस निरीक्षकांनी केली होती.

या पार्श्वभूमीवर काणकोण सामाजिक इस्पितळातर्फे पाण्याचे नमुने गोळा करून तपासणीसाठी पाठवण्यात आले होते. त्‍या अनुषंगाने आता आगोंद येथे पुरविण्यात येत असलेल्या काही टाक्यांचे पाणी पिण्यायोग्य नसल्याचा अहवाल इस्पितळाला प्राप्त झाला आहे.

सदर अहवाल इस्पितळातर्फे काणकोण पोलीस व काणकोण पाणी पुरवठा विभाग यांना सादर केला‌ आहे. आगोंद येथील काही भागात पुरविण्यात येणारे पाणी पिण्यायोग्य नसल्यामुळे या भागातील नागरिकांनी चिंता व्यक्त करून दोषींवर कारवाई करण्याची मागणी केली आहे. तातडीने अशुद्ध पाणी वितरण त्वरित थांबवून शुद्ध पाणी वितरित करण्याची मागणी केली आहे.

कनिष्ठ अभियंत्याची केली होती बदली

काणकोणचे आमदार तथा सभापती रमेश तवडकर यांनी आगोंद, मुडकुड येथे ग्रामस्थांसमवेत पाण्याच्या टाकी व पंपहाऊसचे निरीक्षण करून संबंधितांना आवश्यक त्या सूचना केल्‍या होत्या. त्यानंतर संबंधित विभागाने एका कारवाईत या ठिकाणी अनेक वर्षे कार्यरत असलेल्या कनिष्ठ अभियंत्याची तातडीने अन्यत्र बदली केली होती. अशा धडक कारवाईची आता गरज आहे, असे लोक बोलू लागले आहेत.