पणजी: गोव्यात सुरु असणाऱ्या अवैध कॅसिनोवरुन विधानसभा पावसाळी अधिवेशनात घमासान झाले. आमदार विजय सरदेसाईंनी गोव्यात अवैध पद्धतीने सुरु असलेल्या कॅसिनोबाबत प्रश्न उपस्थित केला. मुख्यमंत्री डॉ. प्रमोद सावंत यांनी अवैध कॅसिनोंवर कारवाई करण्याचे आश्वासन देत, सरकारला युवावर्गच महत्वाचा असल्याचे स्पष्ट केले.
गोव्यात मोठ्या प्रमाणावर अवैध पद्धतीने कॅसिनो सुरु असल्याचा मुद्दा आमदार विजय सरदेसाई यांनी प्रश्नोत्तराच्या तासात उपस्थित केला. तसेच, अनेक ठिकाणी कॅसिनोची जाहिरात करणारे फलक लावल्याचेही त्यांनी सांगितले.
शिवाय जमिनीवरील कॅसिनोकडून सरकारला 349 कोटी रुपयांचे महसूल येणे बाकी असल्याचेही त्यांनी सांगितले.
यावर उत्तर देताना राज्यातील विविध भागांत बेकायदेशीररीत्या सुरु असलेले कॅसिनो बंद करण्याचे आश्वासन मुख्यमंत्री प्रमोद सावंत यांनी सभागृहात दिले. तसेच, बेकायदा होर्डिंग्जवर राज्य सरकारची कारवाई सुरु आहे. तसेच, सरकारला महसूल मिळणार नाही अशा जाहिरातींचे होर्डिंग्ज राज्यात झळकावू देणार नाही, असेही मुख्यमंत्री सावंत म्हणाले.
कॅसिनोंकडून 349 कोटी 89 लाख 63 हजार 5 रूपये राज्याला येणे बाकी. ही रक्कम सरकार कधी वसूल करणार? असा सवाल आमदार विजय सरदेसाई यांनी उपस्थित केला.
यावर उत्तर देताना येत्या वर्षभरात सर्व रक्कम सरकार वसूल केली जाईल, जे कॅसिनो रक्कम भरणार नाहीत त्यांची मालमत्ता जप्त केली जाईल असे मुख्यमंत्र्यांनी सांगितले.
न्यायालयीन आदेशानूसार इतर होर्डिंग्ज झाकलेली असताना, मुंबई उच्च न्यायालय प्रकल्पापासून काही मीटर अंतरावर मांडवी नदीच्या पलीकडे असलेले 'मॅजेस्टिक प्राइड' हे होर्डिंग पाडण्याचे धाडस मुख्यमंत्री डॉ. प्रमोद सावंत करतील का? सदर होर्डिंग उच्च न्यायालयाच्या आदेशाचे सरसकट उल्लंघन आहे, असे विरोधी पक्षनेते युरी आलेमाव म्हणाले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.