IFFI 2023: 'इफ्फी'मध्ये हिमाचल प्रदेशचे पोलिस सादर करणार 'हार्मनी ऑफ द पाइन्स', देशातील पहिलाच बँड

IFFI 2023: गोव्यात सोमवारपासून ५४ व्या भारतीय आंतरराष्ट्रीय चित्रपट महोत्सवाला सुरूवात झाली आहे. यंदाच्या 'इफ्फी' काही खास गोष्टीही आहेत. त्यापैकी एक म्हणजे आता हिमाचल प्रदेश पोलिसांच्या बँडतर्फे येथे एक कार्यक्रम होणार आहे.

इफ्फीच्या समारोप सोहळ्यावेळी हिमाचल प्रदेशचे पोलिस ऑर्केस्ट्रा हार्मनी ऑफ द पाईन्स सादर करणार आहेत. या पोलिस बँडमधील पोलिस कर्मचारी त्यासाठी कसून सराव करत आहेत.

दरम्यान, यानिमित्ताने भारतीय आंतराष्ट्रीय चित्रपट महोत्सवात सादरीकरणासाठी प्रथमच एका पोलिस बँडची निवड करण्यात आली आहे. त्यामुळे हिमाचल प्रदेश पोलिसांसाठी हा अभिमानाची बाब आहे.

पोलिस निरीक्षक विजय कुमार यांच्या नेतृत्वाखालील हिमाचल प्रदेश पोलिस बँडचे हे पथक 26 नोव्हेंबरला गोव्याला रवाना होणार आहे. २८ नोव्हेंबर रोजी इफ्फीचा समारोप आहे. या समारंभातील पोलिसांच्या या सादरीकरणाची सर्वांनाच उत्सुकता आहे.

इन्स्पेक्टर विजय कुमार यांनी हिंदी प्रसारमाध्यमांशी बोलताना म्हटले आहे की, आमच्या बँडने 'तिरंगा' हे गाणे या खास सादरीकरणासाठी निवडले आहे.

कैवल्य शाह यांनी हे गाणे लिहिले आहे. तर गुरू शर्मा यांनी संगीतबद्ध केले आहे. तिरंगा गाण्याचे दिग्दर्शक राजीव जामवाल आहेत. ते पालमपूर येथील आहेत

लक्ष्मीकांत प्यारेलाल यांच्या बॅनरखाली मुंबईत हे गाणे रेकॉर्ड केले आहे. आम्हाला देखील या सादरीकरणाची खूप उत्सुकता आहे. इफ्फी सारख्या आंतरराष्ट्रीय मंचावर कला सादर करण्याची संधी मिळणे आनंददायी आहे.

विजयकुमार यांनी हिमाचल प्रदेशच्या जनतेसह राज्याचे मुख्यमंत्री सुखविंदर सिंग सुखू, डीजीपी आणि सर्व पोलिस अधिकारी आणि कर्मचाऱ्यांचे आभार मानले आहेत.