लोकांचा प्रतिसाद पाहून भारावलोय : बाबू कवळेकर

केपे: केपे मतदारसंघातील लोकांचा मिळत असलेला उदंड प्रतिसाद पाहून मी भारावून गेल्याचे उपमुख्यमंत्री तथा केपेचे आमदार बाबू कवळेकर यांनी सांगितले. आज इग्रामळ येथे प्रचारावेळी शेकडो कार्यकर्ते त्यांच्याबरोबर प्रचारात सहभागी झाले होते.

केपे (Quepem) पालिका क्षेत्रात ख्रिस्ती मतदारांची संख्या मोठी असल्याने ही मते भाजपकडे न जाता काँग्रेसकडे जाणार असल्याचे काँग्रेस कार्यकर्त्यांचे गणित आहे. पण आपण प्रचारासाठी फिरताना प्रत्येक घरातील व्यक्ती आमच्यासोबत जोडली जात आहे. ते पाहता लोकांचे आभार कसे व्यक्त करावे हे मला समजत नाही असे कवळेकर (Babu Kavalekar) म्‍हणाले. भाजपने सर्वांगीण विकासावर भर दिला आहे. विकास करताना अथवा योजना चालीस लावताना कोणताच भेदभाव न केल्याने लोकांचा विश्वास भाजपवर बसला आहे. यासाठी सर्व जाती-धर्मांचे लोक आपल्याबरोबर जोडले जात असल्याचे त्‍यांनी सांगितले.

माजी नगरसेवक कामिलो सिमॉईश म्‍हणाले की, कवळेकर हे पाचव्यांदा निवडून येणार आहे यात कोणतेच दुमत नाही. त्‍यांनी केपेत अनेक विकासकामे केली असून लोकांचा त्यांना उदंड पाठिंबा मिळत आहे. ख्रिस्ती मतदार यावेळी भाजपबरोबर राहणार असून काँग्रेस (Congress) पक्षाचे अस्तित्व संपल्यातच जमा आहे, असेही ते म्‍हणाले.