Goa Rain Update: गोव्यात मुसळधार पावसाचा इशारा; हवामान खात्याकडून ऑरेंज अलर्ट

पुणे: दक्षिण-पश्‍चिम मॉन्सूनच्या हालचालींना वेग येत आहे. येत्या दोन ते तीन दिवसांत मॉन्सून अरबी समुद्र, मालदीव, कोमोरिन परिसर आणि बंगालच्या उपसागरातील काही भागांमध्ये आणखी पुढे सरकण्यास अनुकूल स्थिती आहे, असे भारतीय हवामानशास्त्र विभागाने स्पष्ट केले आहे.

या प्रभावामुळे संपूर्ण महाराष्ट्र राज्यासह कोकण, गोवा राज्यात पुढील चार ते पाच दिवस मेघगर्जना, विजांचा कडकडाट आणि वादळी वाऱ्यासह हलक्या ते मध्यम स्वरूपाचा पाऊस पडण्याची शक्यता आहे. त्यामुळे संपूर्ण महाराष्ट्र राज्याला पुढील चार ते पाच दिवस ‘यलो अलर्ट’ दिला आहे.

उद्यापासून राज्यात ‘मुसळधार’ शक्‍य

हवामान खात्याने गोव्‍यासह १६ राज्यांमध्ये जोरदार पावसाचा इशारा जारी केला आहे. राज्यात काही दिवसांपासून ढगाळ वातावरण आहे. काही ठिकाणी पाऊसही पडत आहे. आता हवामान खात्‍याने २०, २१, २२ मे रोजी ऑरेंज अलर्ट दिला आहे. या काळात मुसळधार पाऊस पडू शकतो.