गोव्यातील सात आघाडीच्या सुत्रसंचालकांचे एकाच मंचावरुन मार्गदर्शन

फातोर्डा : पलाश अग्नी स्टुडिओजने (Studio) नित्यानंत क्रिएशन्ज व थींक एण्ड इंकच्या (Think and Inc) सहकार्याने आयोजित "सुत्र सप्तक" या सुत्रसंचालनवर आधारीत ऑनलाईन मार्गदर्शन व प्रशिक्षण कार्यक्रमाला उत्स्फुर्त व अभूतपुर्व असा प्रतिसाद लाभला. गोव्यातील अनुभवी व आघाडीचे सुत्रसंचालक डॉ. अजय वैद्य, डॉ पुर्णानंद च्यारी, संगीता अभ्यंकर, डॉ. रुपा च्यारी, पंकज नमशीकर, प्रा. गोविंद भगत व अनंत अग्नी  यांनी सुत्रसंचालन संदर्भातील अनेक मूलभूत व महत्वाच्या विषयांवर आपले विचार व अनुभव व्यक्त केले. सलग सात दिवस चाललेल्या या कार्यक्रमाला गोव्यातीलच नव्हे तर महाराष्ट्र, मंगळुर, कोचिन, कारवार येथील हजारो कोकणी भाषिकांनी व सुत्रसंचालनात गोडी व आवड बाळगणाऱ्यांनी  फेसबुक व युट्युब माध्यमांतुन या कार्यक्रमाचा आस्वाद घेतला.

डॉ. अजय वैद्य यांनी आवाज शैलीवर आपले विचार मांडले. सुत्रसंचालकासाठी शब्द उच्चारणीसाठी बाराख़डी व व्यंजनांचा नित्यनेमाने उच्चारण करावे असे सुचविले. डॉ. पुर्णानंद च्यारी यांनी सु्त्रसंचालक हा कलाकार असतो व आपले भाषेवरील प्रभुत्व या विषयाबद्दल सांगितले. वाक्चातुर्यावर आधारीत अनेक व्यवसायांबद्दलची माहिती संगीता अभ्यंकर यांनी दिली. सामाजीक, सार्वजनिक व कौटुंबिक कार्यक्रमाचे सुत्रसंचालन करताना कोणती पथ्ये पाळावी याची सविस्तर माहिती दिली. डॉ. रुपाच्यारी यांनी सुत्रसंचालनातील आपले बरे वाईट अनुभव कथन केले. कुठल्याही परिस्थितीत सुत्रसंचालकाने धीरगंभीर रहावे व आपला आत्मविश्र्वास तिळमात्र गमावू नये असे स्पष्ट केले.

सुत्रसंचालनाची पुर्वतयारी करताना स्वताची ओळख, ताकद जाणणे गरजेचे असल्याचे प्रा. गोविंद भगत यांनी सांगितले. सुत्रसंचालनात चुकीला जागा नाही असेही ते म्हणाले. रंगमंचावर येण्यापुर्वीच सुत्रसंचालकाने पूर्व तयारी करावी. त्यासाठी आयोजकांकडून कार्यक्रमाची संपुर्ण माहिती जाणून घ्यावी, संस्थेची माहिती, कार्यक्रमाचा उद्देश, कार्यक्रमाची रुपरेषा, संपर्कासाठीचा आयोजकांचा एक प्रतिनिधीची निवड, पेहराव, कार्यक्रमांतील वक्त्यांची माहिती जाणुन घेणे आवश्यक असल्याचे ते म्हणाले. या मालिकेचे समारोपाचे सातवे पुष्प सुत्रसंचालनात 25 वर्षे पुर्ण केलेल्या अनंत अग्नी यांनी गुंफले. रंगमंच व्यवस्थापनाचे महत्व व ते कसे करावे यावर अग्नी यांनी चांगल्या पद्धतीने प्रकाश पाडला.

स्वतामधील कमजोऱ्या नष्ट करण्यासाठी सातत्य, सुदारणा, आत्मविश्र्वास, प्रसंगावधान, आनंदी मुद्रा, चेहऱ्यावरील हावभाव, चलाखी, हुषारपणा हे घटक महत्वाचे असल्याचेही त्यांनी स्पष्ट केले.अक्समात येणाऱ्या अडचणींना व प्रसंगांना कसे निभावुन नेताता यावरुन सुत्रसंचालकाची परिपक्वता सिद्ध होत असते असेही अग्नी यांनी सांगितले. शिवाय प्रेक्षक वर्गाचा अभ्यास करणे, आपले निवेदन थोडक्यात पण त्याचबरोबर माहितीपुर्ण कसे असावे हेपण महत्वाचे असल्याचे अग्नी यांनी सांगितले. शिवाय सुत्रसंचालकाने कुठल्याही कार्यक्रमाची स्वताचे हस्तलिखित तयार करणे तेवढेच महत्वाचे असल्याचेही अग्नी यांनी सांगितले.प्रत्येक दिवशी कार्यक्रमाचे संयोजन पुर्वा गुडे, पलाश अग्नी, अनीश अग्नी, वैदही झारापकर, युगा घोटगे व अन्वेषा सिंगबाळ  यांनी केले