Amit Shah In Goa : काँग्रेस कार्यकर्त्यांची धरपकड; अमित पाटकर संतप्त

Amit Shah In Goa: भाजपने कर्नाटकात विधानसभा निवडणुका जिंकण्यासाठी म्हादईच्या केलेल्या ‘कराराचा’ निषेध करण्यासाठी काँग्रेस कार्यकर्ते केवळ काळे झेंडे दाखवण्याचा प्रयत्न करत होते. मात्र, त्यांच्यावर त्यापूर्वीच कारवाई करण्यात आली, भाजप सरकारने केलेल्या कृत्याचा काँग्रेसने निषेध केला.

केंद्रीय गृहमंत्री अमित शहा यांच्या फोंडा येथील सभेपूर्वी काँग्रेसच्या अनेक नेत्यांना पोलिसांनी ताब्यात घेतले. तसेच माध्यम विभागाचे अध्यक्ष अमरनाथ पणजीकर यांना नजरकैदेत ठेवले गेले.

गोवा काँग्रेस प्रदेश समिती अध्यक्ष अमित पाटकर म्हणाले, संपूर्ण सरकारी यंत्रणा आमच्या विरोधात वापरली गेली. आम्ही फोंड्यात पोहचण्यापूर्वीच आम्हाला वाटेवर अडवून ताब्यात घेण्यात आले.

आम्ही फक्त अमित शहा आणि भाजप नेत्यांकडून म्हादईच्या मुद्यावरून स्पष्टीकरण जाणून घेण्यासाठी निघालो होतो. आम्हाला शहा यांनी आमची म्हादई कर्नाटकला विकली आहे का? हेच जाणून घ्यायचे होते.

अमरनाथ पणजीकर म्हणाले, काँग्रेस नेते केवळ म्हादईच्या मुद्यावर भाजप नेत्यांकडून स्पष्टीकरण मागून निषेध करण्याचा प्रयत्न करत होते. गोवा सरकार आणि पोलिसांच्या कृतीने भाजपने लोकशाहीची हत्या केली आहे.

पोलिस सकाळपासून माझ्या मागावर होते. मी जुने गोवे येथे माझ्या बहिणीच्या घरी गेल्यानंतर मला नजरकैदेत ठेवण्यात आले. मला बाहेर जाण्याची परवानगी दिली नाही. पोलिसांनी मला नजरकैदेत ठेवल्याचे ते म्हणाले.

दबावतंत्राला न घाबरता निदर्शने

माजी प्रदेशाध्यक्ष गिरीश चोडणकर आदींनी म्हादईप्रश्नी अमित शहा यांनी स्पष्टीकरण द्यावे या मागणीसाठी फोंडा येथे निदर्शने केली. याप्रसंगी विरेंद्र शिरोडकर, विजय भिके, ज्योएल आंद्रादे, नौशाद चौधरी, राजेश वेरेकर आणि इतर नेते उपस्थित होते.

भाजपच्या दबावतंत्राला न घाबरता कार्यकर्त्यांनी निदर्शने केल्याचे अमरनाथ पणजीकर यांनी नमूद केले. काँग्रेसने गोव्यात सत्ता असताना कधीही अशा हुकूमशाही पद्धतीचा वापर केला नाही आणि जनतेचा आवाज दाबण्याचा प्रयत्नही केला नसल्याचेही ते म्हणाले.

"म्हादईबाबत ज्यांनी तडजोड केली, त्यांचे गोव्यातील भाजप नेत्यांकडून स्वागत केले जात आहे. हा म्हादईला आपली आई जीवनदायिनी म्हणणाऱ्यांचा अपमान आहे."

- गिरीश चोडणकर