CM Pramod Sawant on Jobs in Goa : गोव्यात नोकरी मिळवायची असेल तर एक चुकीचा समज आहे, की आपला आमदार किंवा मंत्री नोकरी मिळवून देईल. मात्र यापुढे गोव्यात असं काहीही होणार नाही. त्यामुळे नोकरीसाठी आमदार किंवा मंत्र्यांच्या भेटी घेणं बंद करा असा सल्ला गोव्याचे मुख्यमंत्री डॉ. प्रमोद सावंत यांनी दिला आहे. गोव्यात यापुढे सर्व सरकारी पदं ही स्टाफ सिलेक्शन कमिशनमार्फत भरली जातील त्यामुळे ज्यांना नोकरी हवी असेल त्यांनी या आयोगामार्फतच अर्ज करण्याचं आवाहनही मुख्यमंत्र्यांनी केलं आहे.
राज्य सरकारच्या रोजगार आणि कामगार मंत्रालयातर्फे जाहीर केलेल्या मेगा जॉब फेअरमध्ये 15 हजार जणांनी नोंदणी केली आहे. 155 कंपन्यांतील जवळपास 5 हजार जागांसाठी आज मंगळवारी आणि 9 रोजी बुधवारी एकूण 4 स्लॉटमध्ये ही भरती प्रक्रिया होईल, अशी माहिती रोजगार आणि कामगार आयुक्त राजू गावस यांनी दिली आहे.
बेरोजगारांना संधी उपलब्ध करून देण्यासाठी एका छताखाली ताळगाव पठारावरील डॉ. श्यामाप्रसाद मुखर्जी इनडोअर स्टेडियमवर 155 कंपन्यांना एकत्र बोलवून ही भरती प्रक्रिया होणार आहे. संख्या जास्त असल्याने गैरसोय टाळण्यासाठी ही नोकरभरती प्रक्रियेचा एक दिवस वाढवला आहे.
दीड लाख बेरोजगार
पंधरा लाख लोकसंख्या असणाऱ्या आपल्या राज्यात 1 लाख 40 हजार बेरोजगार तरुणांनी एम्प्लॉयमेंट एक्स्चेंज केंद्राकडे नोंदणी केली आहे, अशी माहिती रोजगार आयुक्त गावस यांनी दिली. ही संख्या राज्य सरकार समोरच आव्हान आहे. सध्याची परिस्थिती पाहता तरुणांना नोकरीसाठी अन्य पर्याय शोधावे लागतील, असंही त्यांनी स्पष्ट केलं.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
