वाळपई सरकारी आरोग्य केंद्राचा चेहरामोहराच बदलून गेला आहे. आज वाळपईचे नवीन आरोग्य केंद्र रुग्णांसाठी नवसंजीवनीच ठरत आहे. वाळपईचे आमदार तथा आरोग्यमंत्री विश्वजीत राणे यांनी २००७ पासून लोकप्रतिनिधित्व हाती घेतल्यानंतर आजच्या काळात आरोग्य सेवा लोकोपयोगी ठरलेली आहे.
गेल्या पंधरा वर्षांत आरोग्य सेवा क्षेत्रात प्रचंड बदल घडून लोकांना चांगली वेळेत सेवा मिळते आहे. यामध्ये आरोग्यमंत्री विश्वजीत राणे यांच्याबरोबरच केंद्रातील वैद्यकीय अधिकारी, परिचारिका, कर्मचारी, सुरक्षा रक्षक यांचे महत्त्वाचे योगदान लाभले आहे. वाळपई हे सत्तरीचे केंद्रबिंदू आहे.
नगरगाव, सावर्डे, खोतोडा, डोंगुर्ली-ठाणे, म्हाऊस अशा अनेक ग्रामपंचायत क्षेत्रातील अतिशय दुर्गम भागातील लोकांना वाळपईचे आरोग्य केंद्र लाखमोलाचे ठरत आहे. गेल्या दोन महिन्यांत सत्तरी तालुक्यातील बाराही पंचायत क्षेत्रांत व वाळपई नगरपालिका क्षेत्रात मोफत आरोग्य शिबिरे आयोजित केली आहेत. त्यामुळे ग्रामीण लोकांना जीएमसीमधील डॉक्टरांकडून तपासणी करून मिळाली आहे.
सॅटेेलाईट ओपीडी योजना
वाळपई ग्रामीण भागातील लोकांना प्रत्येकवेळी तपासणीसाठी बांबोळीतील गोमेकॉत जावे लागत होते. त्यासाठी आरोग्य खात्याने आरोग्यमंत्र्यांच्या मार्गदर्शनाखाली पुढाकार घेत वाळपई केंद्रात गोवा मेडिकल कॉलेजची सॅटेेलाईट ओपीडी योजना सुरू केली. गतवर्षी २२ जूनला त्याची सुरुवात केली आहे. दर बुधवारी, शुक्रवारी मेडिकल कॉलेजचे विशेष तज्ज्ञ वाळपई केंद्रात येतात.
आमदारांचे शिबिरांवर लक्ष
प्रत्येक आरोग्य शिबिरात सरासरी सहाशे ते सातशे रुग्णांनी लाभ घेतला असून एकूण ८ ते ९ हजारांहून अधिक लोकांनी शिबिराचा लाभ उठविला आहे. एएसजीआय इस्पितळ, वाळपई आरोग्य केंद्र, आरोग्य खाते, जीएमसी इस्पितळ यांच्या सहयोगाने शिबिरे झालेली आहेत. पर्येच्या आमदार दिव्या राणे, मंत्री विश्वजीत राणे हे नेहमीच आरोग्य शिबिरांवर लक्ष देताना दिसून आले आहे.
सहा ओपीडी विभाग
सर्जरी, ओर्थोपेडिक, गायनॅकोलॉजिस्ट, मेडिसीन, पेडिट्रीशयन, जनरल असे सहा ओपीडी विभाग आठवड्यातून दोन दिवस चालतात. त्यामुळे सत्तरीच्या लोकांना बांबोळीत जाण्याची आवश्यकता भासत नाही. वाळपईतच गोमेकॉतील तज्ज्ञ डॉक्टर तपासणी करीत आहेत. त्याला चांगला प्रतिसाद मिळत असून दर ओपीडीला सहाशेहून अधिक रुग्णांची नोंद असते. या ओपीडीमुळे सत्तरी तालुक्यातील लोकांना खूप फायदा झाला आहे. वेळेवर उपचार मिळत असल्याचे नागरिक सांगतात.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.