परीक्षेला उपस्थित न राहू शकलेल्या गोव्यातील विद्यार्थ्यांसाठी 'खूशखबर'

पणजी: कोविड काळात परीक्षेला उपस्थित न राहू शकलेल्या दहावी आणि बारावीच्या विद्यार्थ्यांना गोवा माध्यमिक आणि उच्च माध्यमिक शिक्षण मंडळाने मोठा दिलासा दिला आहे. या विद्यार्थ्यांची पुन्हा परीक्षा घेण्याचा निर्णय शिक्षण मंडळाने घेतला आहे. (Board Exams in Goa)

गोवा माध्यमिक आणि उच्च माध्यमिक शिक्षण मंडळाने म्हटले आहे की, कोविड -19 (COVID-19) संसर्गामुळे डिसेंबर 2021- जानेवारी 2022 दरम्यान दहावी आणि बारावीची प्रथम सत्र परीक्षेस उपस्थित न राहू शकलेल्या विद्यार्थ्यांसाठी (Students) परत परीक्षेचे आयोजन केले जाईल. ही परीक्षा 10 फेब्रुवारीपासून घेतली जाण्याची शक्यता आहे, असे बोर्डाने म्हटले आहे. 2021-22 मध्ये बोर्डातर्फे प्रथम आणि द्वितीय टर्मच्या परीक्षा घेतल्या जात आहेत.

राष्ट्रीय क्रीडा स्पर्धांमध्ये सहभागी झाल्यामुळे आणि काहींना कोविड -19 ची लागण झाल्यामुळे विद्यार्थी डिसेंबर-जानेवारी 2021-22 मध्ये झालेल्या दहावी आणि बारावीच्या पहिल्या सत्र परीक्षांना उपस्थित राहू शकेले नाहीत. अशा उमेदवारांसाठी, बोर्ड परत पहिली सत्र परीक्षा (Exam) घेईल. या परीक्षेचे वेळापत्रक परीक्षा सुरू होण्याच्या दहा दिवस आधी जाहीर केले जाईल, असे बोर्डाने एका परिपत्रकात म्हटले आहे.

कोविड-19 मुळे गोवा बोर्ड दहावी आणि बारावीच्या विद्यार्थ्यांसाठी शैक्षणिक वर्षाच्या शेवटी एकच सार्वजनिक परीक्षा घेण्याऐवजी दोन सत्र परीक्षा घेत आहे.