पणजी: नैऋत्य बंगालच्या उपसागरात कमी दाबाचे क्षेत्र निर्माण झाले असून, मध्य तामिळनाडू व आसपासच्या परिसरात चक्रीय वाऱ्यांची स्थिती निर्माण झाली आहे. यामुळे ट्रफ तयार झाला असून तो केरळ, तामिळनाडू आणि नैऋत्य बंगालच्या उपसागरातून जात आहे. समुद्रसपाटीपासून ५.८ ते ७.६ किलोमीटर उंचीवर हा ट्रफ पसरलेला आहे.
या हवामान बदलांमुळे पुढील तीन दिवस दक्षिण भारतात पावसाची शक्यता असून, गोव्यातही मध्यम स्वरूपाचा पाऊस पडण्याचा अंदाज गोवा वेधशाळेने व्यक्त केला आहे. राज्यात पावसाची शक्यता लक्षात घेता यलो अलर्ट जारी करण्यात आला आहे. पुढील तीन दिवस राज्यातील काही भागांत विजांच्या कडकडाटासह ताशी ४० ते ५० किलोमीटर वेगाने वादळी वारे वाहण्याची शक्यता आहे.
नागरिकांनी या काळात आवश्यक ती खबरदारी घ्यावी, असे आवाहन करण्यात आले आहे.राज्यात पावसाचा तुटवडा कायम असल्याने शेतीला पुरेसे पाणी मिळणे कठीण झाले आहे. गेल्या आठ दिवसांत समाधानकारक पाऊस न झाल्याने भातशेतीवर परिणाम होण्याची शक्यता निर्माण झाली आहे. त्यामुळे शेतकऱ्यांची नजर आभाळाकडे लागली आहे.
३२ टक्के पावसाची तूट
राज्यात आतापर्यंत केवळ ७८ इंच पावसाची नोंद झाली आहे. या कालावधीत ११५ इंच पाऊस अपेक्षित होता. त्यामुळे राज्यात सुमारे ३२ टक्के पावसाची तूट कायम आहे. पावसाअभावी शेतीच्या कामांवरही परिणाम होण्याची शक्यता व्यक्त होत आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
