Goa Weather Updates: पावसाची उसंत; आता राज्यात गुलाबी थंडी

पणजी: राज्यात पाऊस (Goa Rain) ओसरल्यानंतर आता गोवेकरांना गुलाबी थंडीची (Winter) अनुभूती मिळू लागली आहे. रविवारी राज्यात सर्वत्र दाट धुके शिवाय कुडकुडायला लावणारी थंडीही होती. त्यामुळे पहाटे फिरायला जाणारे लोक ऊबदार कपडे घालून येताना दिसत होते. एरवी पहाटे 30 हून अधिक अंश सेल्सिअस तापमान असते, ते काल 27 ते 29 अंशांपर्यंत खाली उतरले होते.

पुढील काही दिवस पावसापासून दिलासा मिळणार असला तरी गुलाबी थंडी झोंबणार आहे. गेल्या आठवड्यात राज्याला पावसाने झोडपून काढल्यानंतर आता धुके पडू लागले आहेत. त्यामुळे पाऊस ओसरेल, असा अंदाज आहे. हवामान वेधशाळेनेही पाऊस ओसरणार असल्याचे संकेत दिले आहेत. पहाटे राज्याच्या बहुतेक सर्वच भागांत सकाळी 8.30 वाजेपर्यंत दाट धुके होते. पुढील काही दिवस राज्यात असेच वातावरण असेल, असे हवामान वेधशाळेने म्हटले आहे. कोणत्‍याही वादळाचा राज्यावर परिणाम होणार नाही. काही दिवस पाऊस उसंत घेणार आहे. मात्र, धुके कायम असेल, असेही हवामान खात्याच्या वेधशाळेने म्हटले आहे.