Tuyem Hospital: तुये येथील नवे रुग्णालय अखेर ‘गोमेकॉ’शी संलग्न! देखरेख समितीसाठी होणार बैठक

पणजी: राज्यातील आरोग्य सुविधांचा दर्जा सुधारण्याच्या दृष्टीने राज्य सरकारने पेडणे तालुक्यातील तुये येथे नव्याने उभारलेले रुग्णालय आता बांबोळी येथील गोवा वैद्यकीय महाविद्यालयाशी (गोमेकॉ) अधिकृतपणे संलग्न केले आहे. आरोग्य विभागाने यासंदर्भातील अधिसूचना जारी केली आहे.

आरोग्य खात्याचे सहसचिव डॉ. प्रणव भट यांनी जारी केलेल्या अधिसूचनेनुसार, तुये येथील या नवीन रुग्णालयात आता ‘गोमेकॉ’ आणि आरोग्य सेवा संचालनालयाचे डॉक्टर सेवा देणार आहेत.

या डॉक्टरांची आणि वैद्यकीय कर्मचाऱ्यांची नियुक्ती लवकरच स्वतंत्र आदेशाद्वारे केली जाईल, असे अधिसूचनेत म्हटले आहे. त्यामुळे स्थानिक नागरिकांना विशेष उपचारांसाठी आता थेट बांबोळीला जाण्याची गरज भासणार नाही. या निर्णयाला मुख्यमंत्री कार्यालयाने ९ जानेवारी २०२६ रोजीच मंजुरी दिली होती.

देखरेख समितीसाठी उद्या तुये येथे बैठक

तुये हॉस्पिटलमध्ये निर्माण करण्यात येणाऱ्या व्यवस्थेवर देखरेख ठेवण्यासाठी समिती निवडण्याचा निर्णय पेडणे तालुका नागरिक समितीने घेतला आहे. त्यासाठी शनिवार, २४ रोजी सायंकाळी ४ वाजता तुये हॉस्पिटल परिसरात नागरिकांची बैठक बोलावली आहे. या बैठकीला नागरिकांनी मोठ्या संख्येने उपस्थित राहावे, असे आवाहन पेडणे नागरिक समितीचे निमंत्रक ॲड. सदानंद वायंगणकर यांनी केले आहे.

रोडमॅप दाखवा, मगच उदघाटन

सरकार ३० तारखेला या हाॅस्पिटलचे उदघाटन करणार आहे. त्यापूर्वी रुग्णांना कोणत्या सुविधा उपलब्ध केल्या आहेत, याचा सविस्तर रोडमॅप समितीला दाखविण्यासाठी २५ जानेवारीची मुदत दिली होती. सरकार जोपर्यंत शंकांचे निरसन करत नाही, तोपर्यंत घाईगडबडीत उदघाटन करू नये, असे मत व्यंकटेश नाईक यांनी व्यक्त केले आहे.