पणजी: राज्‍य प्रदूषण नियंत्रण मंडळाचे अधिकारी असल्‍याचे भासवून काहीजण विविध भागांतील व्‍यावसायिकांना लुबाडत आहेत. आतापर्यंत अशाप्रकारे व्‍यावसायिकांची सुमारे १.४० लाखांची फसवणूक झाल्‍याच्‍या तक्रारी मंडळाकडे पोहोचल्‍या असून, याबाबत वारंवार स्‍थानिक पोलिस स्‍थानकांत तक्रारी दाखल करूनही यातील संशयितांव कारवाई होत नसल्‍याचे पत्र मंडळाने दोन्‍ही जिल्‍ह्यांच्‍या अधीक्षकांना पाठवले आहे.
मंडळाचे सदस्य सचिव संजीव जोगळेकर यांनी दोन्‍हीही अधीक्षकांना हे पत्र पाठवले आहे. आझोशी–मुरगाव येथील अँथनी रॉड्रिग्‍स यांनी २३ ऑक्‍टोबर २०२४ रोजी सुदेश गावस नामक व्‍यक्तीने आपण प्रदूषण नियंत्रण मंडळाचा अधिकारी असल्‍याचे सांगून आणि आस्‍थापनावर कारवाई करण्‍याची धमकी देऊन आपल्‍याकडून ऑनलाईन पद्धतीने २४,९०० रुपये घेतल्‍याची तक्रार केली होती.
त्‍याबाबत मंडळाने साळगाव पोलिस स्‍थानकात तक्रार दाखल केली होती. काणकोण येथील दीप काणकिया या महिलेने सुदेश गावस, सुदेश भोसले आणि सूरज पेंडसे १८ डिसेंबर २०२४ रोजी अशाच पद्धतीने आपली फसवणूक केल्‍याची तक्रार दाखल केली. त्‍यानंतर नाईकवाडा–कळंगुट येथील मारिया मुखतार शेख यांनीही ३० जानेवारी २०२५ रोजी सिद्धार्थ गावकर आणि सूरज यांनी आपल्‍याला २२,२०० रुपयांना लुटल्‍याची तक्रार केली.
याबाबत मंडळाने पर्वरी पोलिस स्‍थानकात दाखल केली होती. काहीच दिवसांपूर्वी केपे येथील दुर्गादेवी बार अँड रेस्‍टॉरन्‍टसंदर्भात धमकी देऊन सूरज पेंडसे नामक व्‍यक्तीने आपली ९३,४०० रुपयांची फसवणूक केल्‍याची तक्रार दाखल केली. या तक्रारींबाबत स्‍थानिक पोलिसांत मंडळाने वारंवार तकारी करूनही या प्रकरणी संशयितांचा शोध घेण्‍यात पोलिसांना यश आलेले नाही, असे मंडळाने अधीक्षकांना पाठवलेल्‍या पत्रात म्‍हटले आहे.
प्रदूषण नियंत्रण मंडळाच्‍या नावाखाली या संशयितांकडून इतरही व्‍यावसायिकांची फसवणूक होण्‍याची शक्‍यता आहे. त्‍यामुळे पोलिसांनी त्‍यांचा तत्‍काळ शोध घेऊन त्‍यांच्‍यावर कारवाई करावी, अशी मागणीही मंडळाने केली आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
