Solar Ferryboat: धूळखात पडलेल्या 3 कोटींच्या सौर फेरीबोटीचा होणार लिलाव? सरकारसाठी ठरला तोट्याचा सौदा

Solar ferry Goa

पणजी: राज्य सरकारने ऑक्टोबर २०२२ मध्ये ३ कोटी ९७ लाख रुपये खर्चून बांधून घेतलेली सौर इलेक्ट्रिक हायब्रीड फेरीबोट विकण्याशिवाय आता नदी परिवहन खात्यासमोर पर्याय राहिलेला नाही. केवळ उपचार म्हणून ही फेरीबोट भाड्याने चालवण्यास देण्यासाठी पुन्हा निविदा मागवण्यात येणार आहेत, अशी माहिती मिळाली आहे.

या फेरीबोटीची प्रवाशी क्षमता ६० आहे. १३ ऑक्टोबर २०२२ रोजी ती आणल्यानंतर चोडण ते पणजी मार्गावर चालवण्याचा अयशस्वी प्रयत्न करण्यात आला. फेरीबोट चालवणे कठीण झाल्याने ती खासगी कंपनीने पर्यटन क्षेत्रात वापरण्यासाठी भाडेपट्टीवर घ्यावी यासाठीही प्रयत्न करण्यात आले.

त्यासाठी मागवलेल्या निविदेला म्हणावा तसा प्रतिसाद न मिळाल्याने, पुन्हा निविदा मागवण्याचे ठरवण्यात आले आहे. अलीकडे बंदर कप्तान खात्याने विनावापर असलेली टगबोट भंगारात विकण्यासाठी जाहिरात दिली त्या धर्तीवर सौर फेरीबोट विकण्याचा विचार केला जाऊ शकतो.

सरकारने पर्यावरणपूरक आणि आधुनिक वाहतुकीला चालना देण्यासाठी सौरऊर्जेवर चालणारी फेरीबोट बांधण्याचा निर्णय घेतला होता. ही फेरीबोट रोरो सेवेसाठी उपयोगात आणता येईल का, यासाठी केरळमध्ये पाहणी करून नंतर तिची निर्मिती करण्यात आली.

मात्र, प्रत्यक्षात ही फेरीबोट गोवा सरकारच्या नदी परिवहन खात्यासाठी डोकेदुखीच ठरली आहे. अनेक तांत्रिक आणि प्रशासनिक अडचणींमुळे ही बोट धुळखात पडली.

तोट्याचा सौदा

सौरऊर्जेवरील वाहतुकीचा चांगला उपक्रम नियोजनाअभावी अपयशी ठरल्याचे हे उत्तम उदाहरण आहे. ही फेरीबोट सरकारसाठी तोट्याचा सौदा ठरली असून, तिला विकण्याचा निर्णय लवकरच घेतला जाऊ शकतो.