Goa Weather Update: गोव्यात मागील दोन दिवसांपासून पावसाचा जोर वाढला असून, आता हवामान विभागाने गुरुवार (२४ जुलै ) रोजी अतिवृष्टीचा 'रेड अलर्ट' जारी केला आहे. उत्तर गोवा आणि दक्षिण गोवा या दोन्ही जिल्ह्यांसाठी हा इशारा देण्यात आला असून या दिवशी ताशी ६० किलोमीटर वेगाने वाहणाऱ्या वाऱ्यासह अतिवृष्टीची शक्यता वर्तवण्यात आली आहे, ज्यामुळे नागरिकांना विशेषतः सतर्क राहण्याचे आवाहन करण्यात आले आहे.
गेल्या दोन दिवसांपासून राज्यात पावसाची तीव्रता वाढलेली आहे. बुधवारीही प्रतितास ४० ते ६० किमी वेगाने जोरदार वाऱ्यासह पाऊस कोसळण्याची शक्यता हवामान खात्याने वर्तवली होती. त्यासोबतच, राष्ट्रीय महासागर सूचना सेवा केंद्राने राज्यातील समुद्रकिनाऱ्यांवर ३.६ ते ४.२ मीटर उंचीच्या लाटा उसळण्याची शक्यता व्यक्त केली होती. पावसाची वाढती तीव्रता आणि एकंदरीत स्थिती लक्षात घेऊन, गोवा वेधशाळेने बुधवारी 'ऑरेंज अलर्ट' जारी केला होता.
गेल्या २४ तासांत गोव्यात सरासरी २.४० इंच पावसाची नोंद झाली आहे. यासोबतच, आतापर्यंत राज्यात सरासरी ६७.१० इंच पाऊस पडल्याची माहिती आहे. 'रेड अलर्ट'मुळे गुरुवारचा दिवस अधिक धोकादायक ठरू शकतो, असा अंदाज आहे.
हवामान विभागाने नागरिकांना अत्यंत सावध राहण्याचे आणि आवश्यक ती खबरदारी घेण्याचे आवाहन केले आहे. पूरसदृश परिस्थिती किंवा इतर धोके टाळण्यासाठी नागरिकांनी प्रशासनाच्या सूचनांचे पालन करावे आणि अद्ययावत माहितीसाठी हवामान विभागाच्या संदेशांकडे लक्ष ठेवावे, असेही सांगण्यात आले आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.