Goa Monsoon Update: पेडण्यात सर्वाधिक पावसाची नोंद

पणजी: गोवा राज्यात (Goa) अनेक भागांमध्ये अधुनमधून पावसाचा(Rain) जोर होता तर काही ठिकाणी रिपरिप सुरू होती. येत्या पुढील दिवसात पावसाचा जोर कमी असेल, अशी शक्यता हवामान खात्याने वर्तविली आहे.

समुद्र खवळलेला असल्याने मच्छीमारांना होड्या घेऊन समुद्रात न जाण्याचा इशारा दिला आहे. आज पेडण्यामध्ये पावसाचा जोर अधिक होता व राजधानी पणजीत अधुनमधून जोरदार पाऊस पडल्याने लोकांची धांदल उडाली.

अरबी समुद्रातील परिसरात 40 ते 50 किलोमीटर प्रति तास वेगाने वारे वाहणार असल्याने त्याचा परिणाम राज्यात पावसाच्या सरी कोसळण्याची शक्यता भारतीय हवामान खात्याच्या गोवा विभागाने वर्तविली आहे. आज दिवसभरात पेडणे - 7 सें.मी., सांगे - 4 सें.मी., म्हापसा, पणजी व मडगाव प्रत्येकी 3 सें. मी. तसेच जुने गोवे, साखळी, केपे येथे प्रत्येकी 2 सें. मी. तर काणकोण, वाळपई, दाबोळी येथे प्रत्येकी 1 सें. मी. पावसाची नोंद झाली आहे. आतापर्यंत पेडणे, वाळपई व केपे या तीन भागांत 1 हजार मिमी. पेक्षा अधिक पाऊस पडला आहे. राज्यात उद्या सर्वसाधारण कमी - जास्त पावसाची शक्यता हवामान वेधशाळेने वर्तविली आहे.