Goa Monsoon: चिवार-हणजुणे येथे वडाचे झाड घरावर कोसळले; दोन लाखांचे नुकसान

Goa Monsoon: उत्तर गोव्यातील चिवर हणजुणे येथे एक वडाचे मोठे झाड घरावर कोसळले. यात सुमारे दोन लाखांचे नुकसान झाले आहे. सध्या म्हापशातील अग्निशमन दलाच्या जवानांनी हे वडाचे झाड हटविण्यास सुरवात केली आहे.

चिवर हणजुणे वागातोर येथील अमानी हॉटेलजवळ नारायण गावकर यांच्या घरावर हा वटवृक्ष कोसळला. त्यात या निवासी मालमत्तेचे मोठे नुकसान झाले आहे. सुदैवाने या घटनेत जीवीतहानी झालेली नाही. म्हापसा अग्निशमन दलाने तत्काळ घटनास्थळी धाव घेत पंचनामा केला.

हा वटवृक्ष या परिसरातील प्रसिद्ध लँडमार्क होता. गोव्यात कालपासून मॉन्सूनच्या पावसाला सुरवात झाली आहे. त्यातच बिपरजॉय चक्रीवादळाचा थोडा परिणामही गोव्यात जाणवत आहे. त्यामुळे वादळी वारे आणि पाऊस अशी स्थिती काही भागात होती.

त्यातून राज्यात अनेक ठिकाणी झाडे कोसळल्याच्या घटना घडल्या आहेत.

गावकर यांच्या घरावर कोसळलेला हा वटवृक्ष अर्धवट अवस्थेत कोसळला. नारायण गावकर म्हणाले की, वड एरवी ताकद आणि सौंदर्याचे प्रतिक मानला जातो. वड घरावर पडून बरेच नुकसान झाले आहे.

अग्निशमन दलाने दिलेल्या तत्पर प्रतिसादाबद्दल त्यांनी कृतज्ञताही व्यक्त केली.