Goa Garbage: मडगाव रिंग रोड बनले कचऱ्याचे 'डार्क स्‍पॉट'

Goa Garbage: मडगाव शहरातील वाहतूक सुरळीत करण्यासाठी संकल्पित केलेले मडगावचे रिंगरोड कचऱ्याचे डार्क स्पॉट बनत आहेत यात आके, पॉवर हाऊस, कोंब या ठिकाणांच्या रिंग रोडचा समावेश असून परिसरात कचऱ्याचा राशी साचल्‍या असून दुर्गंधीयुक्त पाणी रस्‍त्‍यावरून वाहत आहे.

कोंब येथील रिंगरोडवर वाहनचालकांना गेल्या काही दिवसांपासून रस्त्याच्या कडेला असलेल्या शेतात काळ्या रंगाचे पाणी वाहत असल्याचे दिसत आहे. हे पाणी जवळ असलेल्या सांडपाणी चेंबरमधून नाल्यात वाहून नंतर साळ नदीत जाते.

दरम्यान, या ठिकाणी नवीन सांडपाणी चेंबर टाकण्यासाठी करण्यात आलेली मागणी अजूनपर्यंत पूर्ण करण्यात आलेली नाही. या पाण्यामुळे येथील शेतजमीन नापीक होण्याची शक्यता वर्तविण्यात येत आहे.

पॉवर हाऊस जंक्‍शन रस्त्याच्या परिसरातही रस्त्याच्या कडेला रात्रीच्या वेळी अज्ञात व्यक्तींकडून कचरा आणून टाकण्यात येत असल्याने या ठिकाणीही कचऱ्याच्या राशी पडल्याचे दिसून येते. त्‍यामुळे परिसरात दुर्गंधी पसरली आहे.

अशा प्रकारे मडगाव परिसरातील रिंग रोड कचरामय झाल्याचे दिसून येत आहे. या प्रकरणी स्थनिक प्रशासनाने लक्ष घालून रिंग रोड परिसरातील कचरा हटवून ही जागा सुशोभीत करावी अशी मागणी होत आहे.