Goa News: वादळी वाऱ्यामुळे सुपारीचे झाड घरावर कोसळले, सुदैवाने जीवीतहानी टळली; वाचा दिवसभरातील घडामोडी

सातोडे, सत्तरी यासरख्या दुर्गम भागात राहून गोवा सरकारी अभियांत्रीकी महाविद्यालयात शिक्षण घेणाऱ्या अद्वैत संदेश बर्वे याने बुद्धीबळातील आंतरराष्ट्रीय फिडे मानांकन (क्रमांक 1,603) प्राप्त केले. अद्वैतचे सर्व स्तरातून कौतुक होत आहे.

होंडा वडाकडे येथे भालचंद्र पांडुरंग गावडे यांच्या घरावर सुपारीचे झाड पडून सुमारे 40 हजारांचे नुकसान झाले. वाळपई अग्निशमन जवानांतर्फे मदतकार्य. 60 हजारांची मालमत्ता वाचवण्यात यश. सुदैवाने जीवीतहानी टळली.

फोंडा पालिकेत मूळ भाजप आणि नवे भाजप असे नगरसेवकांचे दोन उभे गट. विद्यमान नगराध्यक्ष आनंद नाईकांच्यावेळी विरेंद्र ढवळीकरांना भाजपकडून देण्यात आले होते आश्वासन. मात्र रवींचा नगरसेवक रुपक देसाईंच्या बाजूने कल. भाजप पक्षश्रेष्ठी कोणत्या नावाला कौल देणार याकडे फोंडावासियांचे लक्ष‌.

होंडा वडाकडे येथील पिसुर्ले अर्बन बँकेजवळ घडलेल्या घटनेत भालचंद्र पांडुरंग गावडे यांच्या घरावर सुपारीचे झाड कोसळले. या दुर्घटनेत सुमारे ४० हजार रुपयांचे नुकसान झाल्याची माहिती समोर आली आहे. अचानक पडलेल्या या झाडामुळे घराचा काही भाग व छप्पर यांचे नुकसान झाले. घटनास्थळी वाळपई अग्निशमन दलाचे जवान तातडीने दाखल झाले आणि मदतकार्य सुरू केले. त्यांच्या तत्परतेमुळे गावडे यांच्या सुमारे ६० हजार रुपयांच्या मालमत्तेचे रक्षण करण्यात यश आले.

पाजीमळ-सांगे मार्गावर आज सकाळी भीषण अपघात झाला. माहिती मिळाल्यानुसार, रस्त्यावरून चालणाऱ्या एका पादचाऱ्याला वाचवण्याच्या प्रयत्नात डंपर आणि बस यांची समोरासमोर धडक झाली. हा अपघात प्रत्यक्षदर्शींनी पाहिला आणि त्यांनी घटनास्थळी घाबरलेल्या लोकांना मदत केली. सुदैवाने अपघातात कोणतीही गंभीर जखम झालेली नाही, मात्र वाहनांचे मोठे नुकसान झाले आहे.

अलिखीत करारानुसार फोंड्याचे नगराध्यक्ष आनंद नाईक ह्यांचा कार्यकाळ संपल्याने फोंडा पालिकेला नव्या नगराध्यक्ष निवडीचे वेध लागलेत. भाजप प्रदेशाध्यक्ष दामू नाईक ह्यांनी भाजपच्या सर्व नगरसेवकांची बुधवारी खास बैठक बोलावली आहे. विरेंद्र ढवळीकर नगराध्यक्षपदाच्या शर्यतीत सर्वात आघाडीवर आहेत. मात्र नव्या नगराध्यक्ष निवडीच्या प्रक्रियेत नाट्यमय घडामोडी घडण्याची शक्यता आहे.

गोवा पोलिसांनी चोरीला गेलेले आणि हरवलेले मोबाईल फोन शोधून काढत सुमारे ५० मोबाईल फोन त्यांच्या मूळ मालकाकडे परत दिले. मिळालेल्या माहितीनुसार, हे मोबाईल फोन कळंगुट, पणजी आणि अंजुना परिसरातून गायब करण्यात आले होते. पोलिसांनी तांत्रिक तपास आणि शोधमोहीम राबवत हे फोन जप्त केले. त्यानंतर औपचारिकरीत्या त्यांचे मालक ओळखून त्यांच्याकडे सुपूर्द करण्यात आले.

राज्यात कोळसा हाताळणीची क्षमता वाढवली जाणार नसल्याचे मुख्यमंत्री डॉ. प्रमोद सावंत यांनी स्पष्ट केले आहे. हॉस्पेट-तिनईघाट रेल्वे मार्गाचे दुपदरीकरण पूर्ण झाल्याची घोषणा केंद्र सरकारकडून करण्यात आली. मात्र, या दुपदरीकरणामागे कोळसा वाहतूक वाढवण्याचा घाट आहे, असा आरोप विरोधकांकडून करण्यात आला होता. मुख्यमंत्री सावंत यांनी हा आरोप फेटाळून लावला आहे.

बाणावली येथे झालेल्या हिट अँड रनमध्ये एकाचा मृत्यू झाला आहे. कारने दुचाकीला दिलेल्या जोरदार धडकेत दुचाकीवरील तिघे गंभीर जखमी झाले. अपघातानंतर जखमींना तातडीने गोमेकॉ इस्पितळात दाखल करण्यात आले. मात्र उपचारादरम्यान राज वीर (रा. कार्मोणा, मूळ उत्तराखंड) याचा मृत्यू झाला. या घटनेनंतर परिसरात खळबळ उडाली असून पोलिसांनी अपघाताचा पुढील तपास सुरू केला आहे.