Pooja Naik: 'माझा कोणत्याही राजकीय पक्षाशी संबंध नाही, पालेकरांकडे फक्त मदतीसाठी गेले', पूजा नाईकचे राजकीय संबंधांवर स्पष्टीकरण

Goa Cash For Job Scam: 'कॅश फॉर जॉब' प्रकरणातील मुख्य आरोपी पूजा नाईक नव-नवे खुलासे करत आहे. तिने नुकतेच या गंभीर प्रकरणी राज्याचे वीजमंत्री सुदिन ढवळीकर यांच्यासोबत काही अधिकाऱ्यांची नावे घेऊन मोठा गौप्यस्फोट केला. या अधिकाऱ्यांपैकीच एक आयएएस निखील देसाई यांनी पूजाला मानहानीची नोटीस पाठवली. यानंतर आता, पूजाने आपल्यावरील विविध आरोप आणि कायदेशीर कारवाईवर स्पष्टीकरण दिले. आपला कोणत्याही राजकीय पक्षाशी संबंध नसल्याचे तिने ठामपणे सांगितले.

मानहानीच्या नोटीसवर उत्तर देण्यास तयार

दरम्यान, आयएएस देसाई यांनी आपल्याविरोधात मानहानीचा खटला दाखल केल्याचे पूजाने मान्य केले. ती म्हणाली, "माझ्या विरोधात आयएएस अधिकारी निखिल देसाई यांनी मानहानीचा खटला दाखल केला आहे. मात्र मला अद्याप कोणतीही कायदेशीर नोटीस मिळालेली नाही. नोटीस मिळाल्यानंतर मी त्यास योग्य ते उत्तर देईन."

या प्रकरणाच्या चौकशीसाठी ती पोलिसांना पूर्ण सहकार्य करत असल्याचेही तिने सांगितले. "मी माझे सर्व मोबाइल नंबर पोलिसांना दिले असून या संपूर्ण प्रकरणाची सखोल चौकशी करण्याची मी विनंती करते," असे तिने स्पष्ट केले.

'अमित पालेकरांकडे फक्त मदतीसाठी संपर्क'

त्याचवेळी, पूजाने तिच्या राजकीय संबंधांवर होत असलेल्या टीकेवरही उत्तर दिले. तिने स्पष्टपणे सांगितले, "मी कोणत्याही राजकीय पक्षात सामील नाही. माझा कोणत्याही पक्षाशी थेट संबंध नाही."

आम आदमी पार्टीचे गोवा प्रदेशाध्यक्ष अमित पालेकर (Amit Palekar) यांची भेट घेतल्याचा तिने खुलासा केला. पूजा म्हणाली, "माझे कुटुंब आणि मी अमित पालेकर यांच्याकडे केवळ मदतीसाठी संपर्क साधला होता. त्यावेळी त्यांनी आम्हाला मदत करण्याचे आश्वासनही दिले होते."

मुख्यमंत्र्यांकडे मदतीची मागणी

या संपूर्ण प्रकरणात फसवणूक झालेल्या लोकांचे पैसे परत मिळावेत यासाठी पूजाने अखेरीस थेट मुख्यमंत्री डॉ. प्रमोद सावंत यांच्याकडे मदतीची विनंती केली. पूजा म्हणाली, "मी मुख्यमंत्र्यांना विनंती करते की, मी नोकरी मिळवून देण्यासाठी ज्यांच्याकडून पैसे घेतले होते, ते पैसे मला परत मिळवून द्यावेत, जेणेकरुन मी ते पीडितांना परत करु शकेन."

पूजा नाईकच्या या वक्तव्यामुळे नोकरी घोटाळा प्रकरणाला नवीन वळण मिळाले आहे. एका बाजूला मानहानीच्या कारवाईला तोंड देण्याची तयारी आणि दुसऱ्या बाजूला मुख्यमंत्र्यांकडे मदतीची मागणी, यामुळे या प्रकरणाच्या पुढील तपासाकडे सर्वांचे लक्ष लागले आहे.