Goa IIT Project: धारगळ, लोलये ते कोडार! ‘आयआयटी’ला राज्यात 10 ठिकाणी नकारघंटा; सरकारसमोर पेच

पणजी: आयआयटी शैक्षणिक संकुल प्रकल्प राबवण्यात राज्यात तब्बल १० ठिकाणी सरकारला अपयश आल्याने आता तो प्रकल्प न्यावा तरी कुठे, असा पेच सरकारला पडला आहे.

फर्मागुढी येथील अभियांत्रिकी महाविद्यालयाच्या संकुलात २०१६ सालापासून आयआयटीचे वर्ग भरत असले तरी त्यांना कायमस्वरूपी संकुल उभारण्यासाठी जागा उपलब्ध करण्यात सरकारला अपयश आले आहे.

धारगळ येथील जागा केंद्रीय मनुष्यबळ विकास मंत्रालयाला पसंत पडली नाही. रिवण येथील जागेची कागदपत्रे व्यवस्थित नव्हती, तर उर्वरित ८ ठिकाणी स्थानिकांच्या विरोधामुळे सरकारला तेथे आयआयटी संकुलाला जागा देण्याच्या निर्णयापासून माघारी फिरावे लागले आहे.

गोव्यासोबत सुरू झालेल्या आयआयटी संकुलांच्या विस्ताराची योजना केंद्र सरकारने राबवणे सुरू केले असतानाच गोव्यात मात्र आयआयटीचे संकुलच उभे राहिले नसल्याने या सुविधेपासून वंचित रहावे लागले आहे. केंद्रीय मंत्रालयाकडून आयआयटी संकुलासाठी जागा निश्‍चितीचा रेटा राज्य सरकारवर वाढत आहे.

वर्ष सुचवलेली जागा

२०१४ धारगळ

२०१५ बेतकी-खांडोळा

२०१६ लोलये

२०१७ उसगाव

२०१७ धारबांदोडा

२०१७ कोटार्ली

२०१९ मेळावली

२०२२ कोटार्ली

२०२३ रिवण

२०२५ कोडार