Colvale Central Jail: पाणीटंचाई, तुटलेली गटारे आणि डासांचा प्रादुर्भाव, कोलवाळ कारागृहात मानवाधिकार आयोगाची अचानक धडक; कैद्यांच्या आरोग्याचा प्रश्न ऐरणीवर

पणजी: कोलवाळ येथील मध्यवर्ती कारागृहात कैद्यांच्या आरोग्याची आणि मूलभूत सुविधांची हेळसांड होत असल्याचे गोवा मानवाधिकार आयोगाच्या पाहणीत उघड झाले आहे. आयोगाने १३ ऑक्टोबर रोजी अचानक पाहणी करून प्रशासनावर नाराजी व्यक्त केली. आयोगाचे अध्यक्ष न्यायमूर्ती भरत देशपांडे, सदस्य डेसमंड डिकॉस्टा आणि प्रमोद कामत यांच्या पथकाने कारागृहातील सुविधांची पाहणी केली. डॉक्टरांनी लिहून दिलेली औषधे एका कैद्याला तब्बल ४५ दिवस मिळाली नसल्याचे आढळले. आयोगाने तातडीने औषधे पुरवण्याचे निर्देश दिले.

कैद्यांना देण्यात येणारी अंडी आणि केळी १५ दिवसांपेक्षा जुनी असल्याचे तसेच अंड्यांना दुर्गंधी येत असल्याचे निदर्शनास आले. ताजी अंडी आठवड्यातून किमान दोनदा खरेदी करण्यास सांगण्यात आले. सांडपाण्याची गटारे तुंबल्याने डासांचा प्रादुर्भाव वाढला असून, अनेक खोल्यांतील डासप्रतिबंधक जाळ्या तुटलेल्या आहेत. पाण्याच्या टाकीतील खराब व्हॉल्व्हमुळे पाण्याची नासाडी होत असल्याचेही आढळले. देखभालीसाठी कनिष्ठ अभियंता आणि कर्मचारी नेमण्यासह वॉटर सेन्सर बसवण्याचे निर्देश आयोगाने दिले.

दोन कैद्यांसाठी असलेल्या खोल्यांत तिघांना ठेवण्यात येत असून, स्वयंपाकघरातील वायुवीजन आणि पिण्याच्या पाण्याच्या शुद्धीकरण यंत्रणेच्या देखभालीचे प्रश्नही समोर आले. मानसिक आरोग्यासाठी (Health) डॉक्टरांच्या नियमित भेटींची शिफारस करण्यात आली आहे. पाहणी अहवालावरील कारवाईचा अहवाल २३ डिसेंबर २०२६ पूर्वी सादर करण्याचे निर्देश देण्यात आले आहेत.

जामीन मिळूनही १९ कैदी तुरुंगात!

जामिनाची रक्कम भरण्याची आर्थिक क्षमता नसल्याने १९ कैदी तुरुंगात आहेत. त्यांच्या प्रकरणांकडे सहानुभूतीने पाहण्याची विनंती प्रधान जिल्हा व सत्र न्यायाधीशांना करण्याचे आयोगाने ठरवले आहे.

कैदी फातिमाला हवा फोन!

बांगलादेशी कैदी फातिमा खातून हिने आंतरराष्ट्रीय फोनची मागणी केली; मात्र ई-मुलाकातचा पर्याय नाकारला. कायद्याच्या चौकटीत तिच्या मागणीवर तोडगा शोधण्याची सूचना आयोगाने केली आहे.