Goa: झोपेत असताना घर कोसळले, सत्तरीतील निराधार महिलेला मंत्री राणे स्वखर्चाने बांधून देणार नवे घर

वाळपई: मलपण-सत्तरी येथील पंढरी गावकर (६८) या निराधार महिलेचे राहते घर भर पावसात कोसळले असून घराच्या भिंतीला मोठे तडे गेल्यामुळे घर हळू हळू कोसळू लागले आहे. ही घटना शनिवारी (ता.१४) रात्री घडली.

पंढरी गावकर झोपल्या असताना जोरदार पावसाने घराचा काही भाग कोसळला. घराच्या भिंतींना तडे गेले असून घरात राहणे धोक्याचे आहे. सध्या त्या शेजारच्या घरात आश्रयाला असून महिन्याला मिळणाऱ्या २ हजार रुपयांवर गुजराण करत आहेत. त्या गरीब असून त्यांना कोणाचाच आधार नाही. त्या घरात एकट्याच राहायच्या.

दरम्यान, ही माहिती आरोग्यमंत्री विश्वजीत राणे यांच्यापर्यंत पोहोचताच त्यांनी तातडीने आपली टीम घटनास्थळी पाठवून परिस्थितीची माहिती घेतली. यानंतर आरोग्यमंत्री राणे यांनी या वृद्ध महिलेला नवीन घर बांधून देण्याचे आश्वासन दिले असून, हे घर ते स्वतःच्या खर्चाने उभारणार आहेत, असे त्यांनी स्पष्ट केले.

सत्तरी हे माझे कुटुंब !

सत्तरी हे माझे कुटुंब आहे आणि इथल्या जनतेची जबाबदारी ही माझीच आहे. पंढरी गावकर यांचे मातीचे घर दुरुस्त होण्यासारखे नाही. त्यामुळे त्यांना मी स्वखर्चाने नवीन घर बांधून देणार आहे, असे आश्वासन आरोग्यमंत्री विश्वजीत राणे यांनी दिले.