Goa Ganesh Immersion: गणेश विसर्जनासाठी गोव्यात 47 ठिकाणी जीवरक्षक तैनात! 35 समुद्रकिनारे आणि 12 अंतर्गत विसर्जनस्थळी विशेष सुरक्षा व्यवस्था

पणजी: गणेशमूर्ती विसर्जनाच्या काळात भाविकांची सुरक्षितता सुनिश्चित करण्यासाठी दृष्टी मरीनकडून राज्यातील ४७ विसर्जनस्थळांवर प्रशिक्षित जीवरक्षक तैनात करण्यात येणार आहेत.

समुद्रकिनारे तसेच अंतर्गत भागातील विसर्जनस्थळी नियुक्त करण्यात आलेले हे जीवरक्षक विसर्जनाच्या निर्धारित दिवशी रात्री उशिरापर्यंत कार्यरत राहणार आहेत. राज्य प्रशासन आणि विविध सुरक्षा यंत्रणांकडून करण्यात येणाऱ्या सुरक्षा व कायदा-सुव्यवस्था व्यवस्थेला या पथकांकडून पूरक सहकार्य मिळणार आहे.

राज्य सरकारने नियुक्त केलेल्या दृष्टी मरीनकडून ३५ समुद्रकिनारे आणि १२ अंतर्गत विसर्जनस्थळे, अशा एकूण ४७ ठिकाणी ही व्यवस्था करण्यात आली आहे. गणेश विसर्जनाचे निर्धारित दिवस १५, १८, २०, २२, २४ सप्टेंबर तसेच ४ ऑक्टोबर असे आहेत. २१व्या दिवशी होणाऱ्या विसर्जनासाठीही जीवरक्षकांची सेवा उपलब्ध राहणार आहे.

धोकादायक ठिकाणी जीवरक्षकांची विशेष मदत

विसर्जनासाठी निवडलेल्या काही समुद्रकिनाऱ्यांवर समुद्राच्या प्रवाहाचा वेग अधिक असल्याने भाविकांनी पाण्यात उतरताना विशेष काळजी घेण्याचे आवाहन करण्यात आले आहे. अशा ठिकाणी मूर्ती घेऊन खोल पाण्यात जाणे धोकादायक ठरू शकते. त्यामुळे विधी पूर्ण झाल्यानंतर समुद्राची स्थिती प्रतिकूल असल्यास जीवरक्षक स्वतः मूर्ती खोल पाण्यात नेऊन विसर्जन करण्यास मदत करणार आहेत.

दृष्टी मरीनचे मुख्य कार्यकारी अधिकारी नवीन अवस्थी यांनी सांगितले की, विसर्जनस्थळी जीवरक्षक भाविकांना सुरक्षित पद्धतीने विसर्जन करण्यासाठी मार्गदर्शन करतील. समुद्र अजूनही नियमित जलप्रवेशासाठी बंद असल्याने भाविकांनी जीवरक्षकांच्या सूचनांचे पालन करावे. समुद्र खवळलेला असल्यास भाविकांना पाण्यात जाण्यापासून रोखून जीवरक्षक मूर्ती खोल पाण्यात नेण्याची जबाबदारी पार पाडतील.

मुख्य प्रवेशद्वारातूनच विसर्जनाचे आवाहन

भाविकांनी विसर्जनासाठी केवळ जीवरक्षक तैनात असलेल्या मुख्य समुद्रकिनारा प्रवेशद्वारांचा वापर करावा, असे आवाहन करण्यात आले आहे. विशेषतः रात्रीच्या वेळी पाण्याची खोली कमी असल्याचा भास होऊन नागरिकांनी समुद्रात पुढे जाणे टाळावे. लहान मुलांवर पालकांनी आणि कुटुंबीयांनी सतत लक्ष ठेवावे, असेही आवाहन करण्यात आले आहे.

उत्तरेतील विसर्जनस्थळे

उत्तर गोव्यात कळंगुट, कांदोळी, वागातोर, हरमल, मांद्रे, केरी, आश्वे, मोरजी, बागा, सिकेरी, हणजूणे, मिरामार आणि शिरदोन या समुद्रकिनाऱ्यांवर जीवरक्षक तैनात असतील.

दक्षिण गोव्यातही व्यापक व्यवस्था

दक्षिण गोव्यात बायणा, बोगमाळो, माजोर्डा, उतोर्डा, बेतालभाटी, बाणावली, गालजीबाग, तळपण, वार्का, झालोर, केळशी, मोबोर, आगोंद, पाळोळे, पाटणे, राजबाग आणि पोळे या समुद्रकिनाऱ्यांवर जीवरक्षकांची नियुक्ती करण्यात येणार आहे.

सुरक्षित विसर्जनासाठी आवाहन

गणेशमूर्ती विसर्जन हा धार्मिक विधी असला तरी समुद्र आणि तलावातील पाण्याची परिस्थिती लक्षात घेऊन भाविकांनी सुरक्षिततेला प्राधान्य द्यावे. जीवरक्षकांच्या सूचनांकडे दुर्लक्ष न करता निर्धारित विसर्जनस्थळांचाच वापर करावा, तसेच लहान मुलांना पाण्याजवळ एकटे सोडू नये, असे आवाहन दृष्टी मरीनकडून करण्यात आले आहे.

अंतर्गत विसर्जनस्थळीही जीवरक्षक : समुद्रकिनाऱ्यांव्यतिरिक्त राज्यातील १२ अंतर्गत विसर्जनस्थळीही जीवरक्षक उपलब्ध राहणार आहेत. यामध्ये म्हापसा तार, पर्रा-वेर्ला तलाव, हळदोणे तलाव, गिरी येथील बस्तोडा विसर्जनस्थळ, साळगाव, पणजी फेरी धक्का, वड्डे तलाव, मोरजी तलाव, कुंभारजुवा फेरी धक्का, बेती फेरी धक्का, बायणा खारेवाडा आणि बाणावली तलाव यांचा समावेश आहे. तसेच पणजी फोर पिलर्स आणि म्हापसा येथील ग्रीन पार्क तलावाजवळही जीवरक्षकांची व्यवस्था करण्यात आली आहे. गावातील पंचायती, सार्वजनिक संस्था तसेच नगरपालिका आणि महापालिकांकडून करण्यात आलेल्या मागणीनुसार प्रत्येक ठिकाणी दोन ते सहा जीवरक्षक तैनात केले जाणार आहेत. गणेश विसर्जनाच्या काळात मोठ्या संख्येने भाविक या ठिकाणी येण्याची शक्यता असल्याने सुरक्षिततेच्या दृष्टीने ही व्यवस्था करण्यात आली आहे.