Vijai Sardesai : गृहमंत्र्यांनी आता घरीच बसणे योग्य; सरदेसाईंचा खोचक टोला

Vijai Sardesai : ड्रग्स प्रकरणाची चौकशी करताना गोवा पोलिसांनी सहकार्यच केले नाही, असा आरोप हैदराबाद येथील पोलिस महासंचालकांनी केल्याच्या पार्श्वभूमीवर गृह खाते सांभाळणारे मुख्यमंत्री डॉ. प्रमोद सावंत यांना गोवा फॉरवर्ड पक्षाचे अध्यक्ष विजय सरदेसाई यांनी पुन्हा एकदा सरकारला लक्ष्य केले आहे.

राज्याची झाली तेवढी बदनामी खूप झाली. आता गृहमंत्र्यांनी घरीच बसणे योग्य होईल, अशी तिखट प्रतिक्रिया त्यांनी व्यक्त केली आहे. दुसऱ्या बाजूने काँग्रेसचे कार्याध्यक्ष युरी आलेमाव यांनी ड्रग्स व्यवसायात गोवा स्वयंपूर्ण होत असल्याचे हे संकेत आहेत, असे टीकास्त्र सोडले आहे. सरदेसाई यांनी केलेल्या ट्विटमध्ये गोव्यातील कायदा व सुव्यवस्था ढेपाळली आहे, अशी टीका केली.

‘ड्रग्स डेस्टिनेशन’मध्ये गोवा ‘स्वयंपूर्ण’

दुसऱ्या बाजूने युरी आलेमाव यांनी केलेल्या ट्विटमध्ये, ‘2018 मध्ये भाजप पदाधिकाऱ्यांच्या कारखान्यातून कॅटामाईन ड्रग्सचा प्रचंड साठा जप्त करण्याची घटना ते आज इतर राज्यांच्या पोलिसांनी गोवा पोलिसांना दिलेले ड्रग्स तस्करांना पकडण्यासाठी असहकाराचे प्रमाणपत्र हे भाजपच्या राजवटीत गोवा ‘ड्रग्स डेस्टिनेशन’ म्हणून ‘स्वयंपूर्ण’ बनल्याचे प्रतिबिंब आहे, असे युरी म्हणाले.