गोवा फॉरवर्डने दिली राज्यपालांना कॅश फॉर जॉब घोटाळ्याची माहिती

मडगाव: गोवा फॉरवर्ड पक्षाच्या (Goa Forward Party) नेत्यांनी बुधवारी राज्यपाल पी एस श्रीधरन पिल्लई (Governor PS Sreedharan Pillai) यांची भेट घेऊन भाजपच्या (BJP) नोकरी (Job Scam) विक्री घोटाळ्यात हस्तक्षेप करण्याची विनंती करणारे निवेदन सादर केले आणि सरकारकडून (Goa Government) या संदर्भात अहवाल मागवण्याचे आवाहन केले.

गोवा फॉरवर्ड पक्षाचे संघटनमं दुर्गादास कामत यांच्या नेतृत्वाखालील शिष्टमंडळाने या घोटाळ्याची माहिती दिली. यावेळी उपाध्यक्ष डॉ. रेणुका डा सिल्वा, अॅड. आश्मा बी आणि इतर उपस्थित होते. पत्रकारांशी बोलताना कामत म्हणाले की, राज्यपालांनी ’जॉब फॉर सेल’ घोटाळ्याची चौकशी करण्याचे आश्वासन दिले आहे. “परीक्षेत फेरफार करणाऱ्या अधिकाऱ्यांची नावे आम्ही त्यांना दिली आहेत. त्यांच्यावर कारवाई झाली पाहिजे.” असे कामत म्हणाले.

कामत म्हणाले की, सार्वजनिक बांधकाम खात्या मधील सुमारे २७ तांत्रिक सहाय्यक अजूनही नियमित होण्यासाठी धडपडत आहेत, परंतु सरकारने त्यांची मागणी बाजूला सारून नवीन पदांची भरती सुरू केली आहे. "अनुभवी कर्मचाऱ्यांना वंचित ठेवून नव्या उमेदवारांना का घेत आहेत." असा प्रश्न कामत यांनी केला.

नोकरीसाठीचे भाजप सरकारचे ‘मेनू कार्ड’ राज्यपालांसमोर ठेवण्यात आल्याचे त्यांनी सांगितले. “ आमच्या पक्षाचे अध्यक्ष विजय सरदेसाई यांनी ऑगस्टमध्ये हा घोटाळा उघड केला होता. तेव्हापासून हा घोटाळा थांबवावा यावर आमचा भर आहे. मात्र, भाजपने निवडणुकीसाठी पैसे आणि मते मिळवण्यासाठी ते चालू ठेवले.’’ असे कामत म्हणाले.

यावेळी उपस्थित असलेल्या सार्वजनिक बांधकाम खात्याच्या कंत्राटी कर्मचाऱ्यांनीही त्यांच्या मागणीकडे दुर्लक्ष केल्याबद्दल भाजप सरकारविरोधात संताप व्यक्त केला. ते म्हणाले की, नवीन भरतीमुळे सध्याचे कंत्राटी कर्मचारी बाहेर पडतील आणि नोकऱ्या खरेदी करणाऱ्यांना नोकऱ्या मिळतील. 'सरकार आमच्यावर अन्याय करत आहे. आम्ही सर्वांनी आमची मागणी घेऊन मुख्यमंत्र्यांची भेट घेतली होती. पण त्यांनी काहीही केले नाही.” असे एका कर्मचाऱ्याने सांगितले.