दामोदर मावजो यांना ज्ञानपीठ म्हणजे गोव्याबरोबर महाराष्ट्राचाही गौरव

मडगाव: यंदाचा ज्ञानपीठ पुरस्कार (Jnanpith Award) प्राप्त झालेले कोकणी (Konkan) साहित्यिक दामोदर मावजो (Damodar Mauzo) यांनी कोकणी आणि मराठी साहित्त्यातील समन्वयाचा पूल उत्तमरीत्या बांधला आहे, त्यामुळे गोव्या (Goa) बरोबरच आम्हा महाराष्ट्रीयन (Maharashtra) साहित्यिकांना तो गोव्या बरोबरच महाराष्ट्राचाही गौरव वाटतो असे मत मराठी कवी सायमन मार्टिन्स यांनी आज माजोर्डा येथे व्यक्त केले.

अखिल भारतीय मराठी साहित्य संमेलनाचे माजी अध्यक्ष फा. फ्रान्सिस द ब्रिटो यांच्यावतीने आज मार्टिन्स यांनी खास वसई मुंबई येथून गोव्यात येऊन हा सत्कार केला. त्यांच्या बरोबर पायस कुतीन्हो हेही उपस्थित होते.

मार्टिन्स म्हणाले, मावजो यांच्या साहित्याचा महाराष्ट्रातही मोठा वाचकवर्ग आहे. एव्हढेच नव्हे तर दक्षिणायान अभियानाच्या माध्यमातून मावजो यांनी पुरोगामी विचारांच्या प्रचाराच्या चळवळीचे नेतृत्व केले आहे त्याचाही आम्हाला अभिमान आहे. खरे तर हा सत्कार फा. ब्रिटो याना स्वतः गोव्यात येऊन करायचा होता. मात्र ते आजारी असल्याने येऊ शकले नाहीत असे ते म्हणाले. या सत्काराला उत्तर देताना, फा. ब्रिटो यांच्यावतीने माझा सत्कार होणे हाच माझ्यासाठी अत्युच्च बहुमान असून मी हा सत्कार नम्रपणे स्वीकारत असल्याचे ते म्हणाले.