Goa Excise Scam : अबकारी घोटाळा दक्षता खात्याकडे : मुख्यमंत्री

Goa Excise Department Scam: दैनिक ‘गोमन्तक’ने उघड केलेला अबकारी खात्यातील घोटाळा सध्या हिमनगाच्या टोकासारखा आहे. अनेक जणांच्या तक्रारी खात्याकडे येतच असून सरकारने आता हा घोटाळा दक्षता खात्याकडून चौकशी करून आवश्‍यकता भासल्यास हे प्रकरण भ्रष्टाचारविरोधी विभागाकडे सोपवण्यात येईल, अशी माहिती मुख्यमंत्री डॉ. प्रमोद सावंत यांनी दिली.

पेडणे येथील एका कार्यक्रमात ते बोलत होेते. यावेळी सावंत म्हणाले की, या घोटाळ्यासंदर्भात खात्यांतर्गत चौकशीनंतर दोषींवर कारवाई करण्यात आली आहे. त्यानुसार या प्रकरणातील सूत्रधार अव्वल कारकून हरिश नाईक याच्यासह अबकारी खात्यातील निरीक्षक दुर्गेश नाईक आणि विभूती शेट्ये यांना बडतर्फ केले आहे.

याशिवाय संबंधितांकडून मूळ रक्कम १८ लाख आणि व्याजासह दंड म्हणून १० लाख रुपये, असे २८ लाख रुपये वसूल केले आहेत. आवश्‍यकता भासल्यास हे प्रकरण दक्षता खात्याकडे वा भ्रष्टाचारविरोधी विभागाकडे सोपवण्यात येईल. या प्रकरणात कोणाचीही गय केली जाणार नाही. दोषी असलेल्यांविरोधात कडक कारवाई करण्यात येईल, असे मुख्यमंत्री यावेळी म्हणाले.

गृहखाते संशयाच्या घेऱ्यात

मुख्यमंत्री हे गृह खात्यासह अबकारी खातेही सांभाळतात. त्यामुळे गृह खात्याच्या साहाय्याने अबकारी खात्याच्या संपूर्ण घोटाळ्याची चौकशी ते सहजपणे करू शकतात. असे असताना संबंधितांच्या विरोधात प्रशासनाने फौजदारी गुन्हा का दाखल केला नाही, असा प्रश्‍न उपस्थित करत विरोधकांनी मुख्यमंत्र्यांच्या कृतिशून्य मौनावर प्रश्‍न उपस्थित केला आहे.

विरोधक आक्रमक

मद्य विक्री परवाना नूतनीकरणातून व्यावसायिकांनी अबकारी खात्याला सुमारे दोन कोटी रुपयांचा चुना लावल्याचा आरोप कॉंग्रेसच्या संजय बर्डे यांनी केला असून आयुक्त नारायण गाड व संबंधित दोषींविरोधात त्यांनी तक्रार दाखल केली आहे. आता या प्रकरणाला आक्रमकता आली असून संशयितांनी इतर मार्गांनीही पैसे मिळवल्याचा संशय व्यक्त केला जात आहे.