Excise Department: अबकारी’चा निष्क्रियपणा समोर; बेकायदा मद्यालय हटवण्यासाठी चालढकल

Excise Department अबकारी खात्यातील घोटाळा प्रकरण सध्या गाजत असतानाच या खात्याच्या निष्क्रियपणाचे आणखी एक प्रकरण उघडकीस आले आहे.

नदी परिवहन खात्याच्या मालकीच्या आणि बंदर कप्तान खात्याच्या मालमत्तेमध्ये गोवा यॉटिंग असोसिएशनला अबकारी खात्याने बेकायदा बार सुरू करण्यास परवानगी दिली आहे. त्याविरोधात बंदर कप्तानने पुरावे देऊनही असोसिएशनला केवळ नोटीस पाठविण्याचे काम अबकारी खात्याने केले.

वर्ष होऊनही त्याविरोधात अबकारी खाते कारवाई करत नसल्याने या बारला संरक्षण देण्यामागे कोणाचा हात आहे, असा प्रश्‍न उपस्थित केला जात आहे. दोना पावला येथील या मालमत्तेत असोसिएशनला अबकारी खात्याने बार सुरू करण्यास परवानगी दिली आहे.

वारंवार तक्रारीकडे काणाडोळा

महत्त्वाची बाब म्हणजे, नदी परिवहन खात्याने 2018 सालीही अबकारी खात्याला पत्रव्यवहार करून या बारचा परवाना रद्द करावा म्हणून विनंती केली होती. तरीही अबकारी खात्याने त्याकडे दुर्लक्ष केले.

जुलै 2022 मध्ये अबकारी खात्याने या प्रकरणाविषयी सर्व अहवाल तयार करून घेतला. नंतर अबकारी आयुक्तांनी बंदर कप्तान खाते, नदी परिवहन विभागप्रमुख आणि गोवा यॉटिंग असोसिएशनला सुनावणीसाठी बोलावले होते.