Goa Electricity Meter: मुदत संपली! गोव्यात वीज खाते करणार धडक कारवाई; सोयीच्या ठिकाणी मीटर लावण्याचा विषय ऐरणीवर

पणजी: अडचणीच्या ठिकाणी असलेले मीटर काढून सोयीच्या ठिकाणी लावण्यासाठी वीज खात्याने काढलेल्या नोटिशीची मुदत संपली आहे. त्यामुळे शनिवारपासून वीज खाते इशारा दिल्यानुसार कारवाई करणार असल्याचे खात्याच्या अधिकाऱ्यांनी प्रसारमाध्यमांना सांगितले.

वीज खात्याचे अधीक्षक अभियंता मयूर हेदे यांनी सांगितले की, काही ग्राहकांचे मीटर घरात असल्याने जेव्हा मीटर रिडर बिलांसाठी रिडिंग घेण्यासाठी येतात, तेव्हा घरे बंद असतात. त्यामुळे रिडिंगसाठी कर्मचाऱ्यांना हेलपाटे घालावे लागतात.

काहीवेळा मीटर बऱ्याच उंच ठिकाणी बसवलेले असते. त्यामुळे त्याचे रिडिंग घेणे जिकिरीचे होते. काहीवेळा ते घेताही येत नाही. त्यासाठीच वीज खात्याने मीटर स्थलांतर करण्याची नोटीस ग्राहकांना दिली होती, म्हणजेच त्यांना सूचित केले होते. सहा महिन्यांची मुदत आज २८ रोजी संपते. त्यामुळे या नोटिशीनुसार कारवाई सुरू होईल.

नोटिशीला ३५ टक्केच ग्राहकांचा प्रतिसाद

वीज खात्याच्या नोटिशीनुसार केवळ ३५ टक्के ग्राहकांनी प्रतिसाद दिला आहे. म्हणजेच ६५ टक्के ग्राहकांचे मीटर हे घराच्या आत वा अडचणीच्या ठिकाणी असावेत. अडचणीच्या ठिकाणच्या १२ हजार मीटरचे स्थलांतरण आधीच केले आहे. मात्र तसे ३८ हजार घरगुती मीटर असल्याची माहिती खात्याकडे आहे. ज्यांनी मीटर स्थलांतरित केले नाही, त्यांची वीज जोडणी तोडण्याची कारवाई खाते सुरू करेल, असेही हेदे यांनी नमूद केले.