Water Flow Meter: 'मतांसाठी मोफत पाणी देणार नाही'! गोव्यात वॉटर फ्लो मीटर’चा होणार वापर; पाणी चोरी, गळतीवर येणार नियंत्रण

पणजी: मतांसाठी मोफत पाणी देण्याच्‍या बाजूने आमचे सरकार नाही. पाण्‍याची चोरी, जुन्या जलवाहिन्‍या आणि सदोष मीटरमुळे सरकार पाण्यावरील ४०% महसूल गमावत आहे. त्‍यावर नियंत्रण मिळवण्यासाठी पाण्याच्या टाक्यांना ‘वॉटर फ्लो मीटर’ बसविण्याचा विचार सुरू असून लवकरच निर्णय घेण्यात येणार आहे, अशी माहिती जलस्रोतमंत्री सुभाष फळदेसाई यांनी दिली.

सोमवारी एका वाहिनीशी बोलताना ते म्‍हणाले, ‘पिण्याचे पाणी गळतीमुळे व चोरीमुळे मोठ्या प्रमाणात वाया जाते. त्यामुळे प्रत्यक्ष तयार होणारे व नागरिकांपर्यंत पोहोचणारे पाणी यात मोठी तफावत निर्माण होतो. त्यामुळे प्रथम पाण्याची गळती व चोरी रोखणे आवश्यक आहे. त्यासाठीच टाक्यांवर ‘वॉटर फ्लो मीटर’ बसविण्याचा निर्णय घेतला जाणार आहे.

भूमिगत जलवाहिन्या गळतात आणि पाणी फुकट जाते. शिवाय पाण्याचा मीटर बाजूला ठेऊन काही थेट पाणी जोडण्या घेतल्या आहेत. त्याचा महसूल मिळत नाही. काही जण घरगुती पाणी जोड घेऊन त्याचा वापर औद्योगिक कारणासाठी करतात. अनेक ठिकाणचे पाण्याचे मीटर चालतच नाहीत. या साऱ्या समस्या दूर करून पाण्याची उपलब्धता वाढवता येणार आहे. वाढत्या

लोकसंख्येला व पर्यटन व्यवसायाला लक्षात घेऊन आगामी काळात पिण्याच्या पाण्याचा पुरवठा सुरळीत ठेवणे ही सरकारसमोरील जबाबदारी आहे, असेही फळदेसाई म्‍हणाले.

माझ्याही मतदारसंघात खोदकामाचा त्रास

मंत्री सुभाष फळदेसाई म्‍हणाले, आम्ही कंत्राटदाराच्या मर्जीने रस्ते खोदकाम करू शकत नाही. वीज विभागाच्या रस्ते खोदकामांमुळे मलाही माझ्या मतदारसंघात त्रास सहन करावा लागला आहे.