Goa Dairy: गोवा डेअरीवर युवा संचालक पाठवा

Goa Dairy: राज्यातील एकमेव गोवा डेअरीच्या सुशासनासाठी नवीन आणि होतकरू युवा संचालक मंडळ निवडण्याची गरज असून सरकारकडून वेळोवेळी सहकार्य केले जात असल्याने सद्यःस्थितीत गोवा डेअरी तग धरून आहे, असे फोंड्यात तीन दूध संस्थांच्या अध्यक्षांनी घेतलेल्या पत्रकार परिषदेत सांगितले.

फोंड्यातील या पत्रकार परिषदेला गोवा वेल्हा येथील दूध संस्थेचे अध्यक्ष रमेश एडातडन, पीर्ण दूध संस्थेचे अध्यक्ष गोविंद नाईक व अभिनव दूध संस्था डिचोलीचे गुरुदास परब उपस्थित होते.

राज्यातील विविध ठिकाणी असलेल्या दूध संस्था जर नफ्यात असतील, तर मग अशा दूध संस्थांचे प्रतिनिधी गोवा डेअरीवर संचालक म्हणून गेल्यानंतर गोवा डेअरी तोट्यात का जाते, असा सवालही यावेळी उपस्थित करण्यात आला.

गोवा डेअरी ही राज्यातील दूध उत्पादकांची शिखर संस्था असून गोवा डेअरीची वाढ झाली पाहिजे, पण गोवा डेअरीवर येणाऱ्या संचालक मंडळाकडून गोवा डेअरीच्या वृद्धीसाठी कोणतेच प्रयत्न झाले नाहीत.

गोवा डेअरीवरील नोकरांची खोगीरभरती आणि चुकीचे निर्णय यामुळे गोवा डेअरीची वाताहत होण्यास कारण ठरले आहे. सरकारकडून गोवा डेअरी सावरण्यासाठी वेळोवेळी साहाय्य केले जाते.

आताही गोवा डेअरीवर असलेल्या प्रशासकीय समितीने बरेच चांगले निर्णय घेतले आहेत. त्यामुळेच गोवा डेअरीचे नुकसान घटले आहे. गोवा डेअरी नफ्यात येण्यासाठी नवीन होतकरू, युवा आणि अनुभव असलेले संचालक डेअरीवर येणे आवश्‍यक असून त्यादृष्टीने सर्व दूध संस्थांच्या प्रतिनिधींनी प्रयत्न करावेत, असे रमेश एडातडन म्हणाले.

गोवा डेअरीच्या पशुखाद्य प्रकल्पाची वाताहत झाली आहे. पशुखाद्य प्रकल्पाला पुरवण्यात येणाऱ्या कच्चा मालाची बिले थकल्यामुळे हा प्रश्‍न निर्माण झाला आहे. पशुखाद्य प्रकल्पाची सुमारे तेरा कोटींच्या बिलांचा हा प्रश्‍न असल्यामुळे पशुखाद्य प्रकल्प तोट्यात गेला.

सद्यःस्थितीत काही दूध संस्थांनी पुणेस्थित पशुखाद्य प्रकल्पाकडून माल खरेदी करण्यासंबंधी कार्यवाही सुरू केली आहे. विद्यमान प्रशासकीय समितीने खर्चात कपात करताना वीज तसेच पाण्याच्या बिलाचे योग्य नियोजन केले असल्याने या समितीचे कार्य चांगले असल्याचेही यावेळी सांगण्यात आले.

पशुखाद्य प्रकल्पासाठी दूध संस्थांचा पुढाकार

गोवा डेअरीचा उसगाव येथील तोट्यात असलेला पशुखाद्य प्रकल्प चालवण्यासाठी राज्यातील दहा दूध संस्थांनी पुढाकार घेतला असून त्यासंबंधीचे एक निवेदन गेल्या १ फेब्रुवारीला सहकार निबंधकांना देण्यात आले आहे. सांतआंद्रे दूध सोसायटी गोवा वेल्हा, अभिनव सहकारी दूध संस्था डिचोली, जय भवानी दूध संस्था साकोर्डा, श्री शांतादुर्गा महिला दूध संस्था अडवलपाल, सेरावली दूध संस्था सालसेत, श्री सातेरी दूध संस्था इब्रामपूर, पीर्ण दूध संस्था पीर्ण - बार्देश, नानोडा दूध संस्था नानोडा - डिचोली, श्री महादेव दूध संस्था बाजारमळ बेतोडा फोंडा, मेरशी दूध संस्था, मेरशी - गोवा या दहाही दूध संस्थांतर्फे सहकार निबंधकांना हे निवेदन दिले असून पीपीपी तत्त्वावरील सरकारच्या आवाहनानुसार हे निवेदन देण्यात आल्याचे यावेळी सांगण्यात आले.