Goa Crime: गोवा पोलिसांनी कर्नाटकात अडवली सांगलीची गाडी, तिघा तस्करांकडून 1.6 कोटी जप्त; बेळगाव आयकर विभागाकडून पुढील तपास सुरु

पणजी: गोव्यातून होणाऱ्या तस्करीचा माग काढत केंद्रीय महसूल गुप्तचर संचालनालयाच्या गोवा विभागाने कर्नाटकात कारवाई केली आहे. या कारवाईत पोलिसांनी तिघांकडून १.६ कोटी रुपये जप्त केले आहेत. पोलिसांनी आयकर विभागाला ही रक्कम सोपवली असून, सध्या बेळगाव आयकर विभागाकडून याची पुढील तपास सुरु आहे.

माध्यमांना मिळालेल्या माहितीनुसार दुबई किंवा इतर परराष्ट्रांमधून सोन्याची तस्करी सुरु होती. या तस्करीसाठी गोव्याप्रमाणे इतर विमानतळाचा वापर केला जायचा. या मिळालेल्या माहितीच्या आधारे पोलिसांनी गुप्तहेरांकडून माहिती मिळवली आणि गोवा, कर्नाटक तसेच महाराष्ट्रतील काही संशयितांना अटक करण्यात आली आहे.

हिरेबागवाडी टोलाजवळ पोलिसांनी सांगली महाराष्ट्र येथील एका गाडीची झडती घेतली असता त्यांच्या हाती १.६ कोटी रुपये लागले. पोलिसांना मिळालेल्या माहितीनुर ही माणसं तस्करी केलेलं सोनं ने-आण करण्याचे काम करायची.

संशयितांना सोने दिलेच नाही..

पोलिसांना मिळालेल्या माहितीनुसार सोन्याचे भाव वाढल्याने तस्करांनी संशयित आरोपींना सोनं दिलंच नाही आणि हीच रक्कम घेऊन परत येत असताना पोलिसांनी तिघा संशयितांना ताब्यात घेतले. डीआरआयने केलेल्या तपासात महाराष्ट्रातही काही सोनार यात सामील असण्याची शक्यता आहे. हे सोनार परदेशातून सोनं विकत आणतात अशी माहिती मिळाल्याने सध्या पोलीस यावर नजर ठेऊन आहेत.