Goa Carnival: मडगाव कार्निव्हल मिरवणुकीत लहान मुलांच्या जिवाशी खेळ, आयोजकांविरोधात काँग्रेसची तक्रार

Goa Congress: बहुचर्चित अशा कार्निव्हल फेस्टिवलला पर्वरीत शुक्रवारीकर्टन रेझरने दिमाखात सुरुवात झाली. शनिवारी 10 फेब्रुवारीला राजधानी पणजीत कार्निवल दिमाखात संपन्न झाल्यावर रविवार 11 फेब्रुवारीला मडगावात कार्निव्हल परेड पार पडली.

या परेड वेळी सरकारी अधिकाऱ्यांनी कर्तव्यात कसूर केल्याबद्दल गोवा प्रदेश काँग्रेस समितीने आज दक्षिण गोव्याच्या जिल्हाधिकाऱ्यांकडे लेखी तक्रार दाखल केली.

काँग्रेसचे सरचिटणीस मोरेनो रिबेलो यांनी खजिनदार ऑरविल दौराद आणि ओलेन्सिओ सिमोयस यांच्यासह दक्षिण गोव्याचे अतिरिक्त जिल्हाधिकारी श्रीनेत कोठवाळे यांच्याकडे तक्रार सुपूर्द केली आहे.

त्यांच्या म्हणण्यानुसार पर्यटन खाते आणि मडगाव नगरपालिका यांच्या संयुक्त विद्यमाने गोवा सरकारने आयोजित केलेल्या कार्निव्हल मिरवणुकीसाठी आलेल्या प्रेक्षकांची कोणतीही व्यवस्था केली नव्हती.

आलेल्या प्रेक्षकांना उंच आणि संरक्षक कठडा नसलेल्या भिंतीचा आधार घेत उंचावर बसून परेड पाहावी लागली. समाजमाध्यमांवर व्हायरल होत असलेल्या व्हिडीओंमध्ये लहान मुले आणि लोक जमिनीपासून सुमारे 15 ते 20 फूट उंच असलेल्या भिंतीवर धोकादायकपणे बसलेले दिसतात.

एवढ्या उंचीवरून पडणे जीवघेणे ठरू शकते, असे काँग्रेस पक्षाने आपल्या तक्रार पत्रात नमूद केले आहे.

काँग्रेस पक्षाने आपल्या अधिकृत सोशल मीडिया प्लॅटफॉर्मवर अर्धवट कोसळलेल्या भिंतीवर लहान मुले बसलेली स्पष्टपणे दिसत असलेला व्हिडिओ अपलोड केला असून दक्षिण गोव्याचे जिल्हाधिकारी, पोलीस महासंचालक आणि दक्षिण गोव्याचे पोलीस अधीक्षक यांच्याकडून कारवाईची मागणी केली आहे, असे पत्रात पुढे म्हटले आहे.

लोकांचा; विशेषतः लहान मुलांचा जीव धोक्यात घालण्यासाठी जबाबदार असलेल्या सर्वांवर कठोर कारवाई करण्यासाठी आम्ही ही अधिकृत तक्रार तुमच्यासमोर सादर करत आहोत.

गोवा सरकारचे पर्यटन खाते, मडगाव नगरपालिका, गोवा पोलीस तसेच जिल्हाधिकारी कार्यालय आणि इतर सहयोगी विभागांच्या अधिकाऱ्यांकडून निष्काळजीपणा आणि कर्तव्यात दुर्लक्ष झाले आहे, असे मोरेनो रिबेलो यांनी त्यांच्या तक्रार पत्रात नमूद केले आहे.