Goa Winter: धुक्यात हरवला गोवा! हुडहुडी वाढली; पुढचे 2 दिवस कसे राहणार हवामान? वाचा..

पणजी: उत्तरेकडून वाहणाऱ्या शीत वाऱ्याचा प्रभाव पुन्हा वाढला असल्याने राज्यात किमान तापमानाचा पारा १८.१ अंशांवर गेला असून सामान्य किमान तापमानाच्या तुलनेत -२.५ अंशांनी घटले आहे. यंदाच्या तापमानातील हे दुसरे नीचांकी तापमान आहे.

यंदा १२ डिसेंबर रोजी सर्वात कमी म्हणजे १७.५ अंश सेल्सिअस तापमानाची नोंद करण्यात आली होती. राज्यात किमान तापमानासोबतच आर्द्रेतेतही मोठ्या प्रमाणात घट नोंद करण्यात आली. राज्यात किमान ६१ टक्के आर्द्रता नोंदविण्यात आली जी सामान्य आर्द्रतेच्या तुलनेत -१३ वर पोहोचली होती.

राज्यात पुढील तीन-चार दिवस किमान तापमान १९ ते २० अंश सेल्सिअस दरम्यान राहण्याची शक्यता गोवा वेधशाळेकडून वर्तविण्यात आली असून पहाटे दव व धुके पडण्याची शक्यता देखील आहे.

आकडेवारीनुसार, आतापर्यंत १२ डिसेंबर १९८१ साली सर्वांत कमी म्हणजेच १५.७ अंश सेल्सिअसवर किमान पारा गेला होता. अनेकदा डिसेंबरमध्ये तापमानात १६, १७ अंशांवर गेले आहे. राज्यात वाढत्या थंडीमुळे संसर्गजन्य आजारात देखील मोठ्या प्रमाणात वाढ झाली आहे.

खोकला, पडसे, ताप, अंगदुखी, पोटदुखी असे आजार वाढले असून नागरिकांनी आरोग्याची काळजी घेण्याचे आवाहन करण्यात येत आहे. वाढत्या थंडीमुळे राज्यात रात्रीपासून पहाटेपर्यंत धुके, तसेच मोठ्या प्रमाणात दव पडत आहेत.