Goa Beach Shacks: आदेशाचे उल्लंघन पडले महागात; कळंगुट बागा समुद्र किनाऱ्यावरुन नियमबाह्य शॅक्स पोलिसांनी हटवल्या

बागा: गोव्यातील समुद्र किनाऱ्यांवरील शॅक्सना काही ठराविक अंतरावरच बेड्स लावण्याची परवानगी देण्यात आली होती, मात्र शॅक मालकांनी हा आदेश न पळता मोजून दिलेलं अंतर सोडून बेड्स लावल्याने बुधवारी (२२ जानेवारी) कळंगुट-बागाच्या किनाऱ्यावर छापा टाकत पोलिसांनी शॅक मालकांवर कारवाई केली.

समुद्र किनाऱ्यांवर शॅकचा व्यवसाय चालवणाऱ्या व्यावसायिकांना शॅकपासून १५ मीटरच्या अंतरापर्यंत बेड्स लावण्याची परवानगी देण्यात आली होती, मात्र त्यांनी या आदेशाचं पालन न केल्याने पर्यटकांसाठी येण्याजाण्याच्या व्यत्यय निर्माण व्हायचा. बुधवारी पोलिसांनी तसेच पर्यटन विभागाच्या काही अधिकाऱ्यांनी या समुद्र किनाऱ्याला भेट देऊन तिथल्या शॅक व्यावसायिकांवर कारवाई केली, तसेच त्यांच्याकडून दंड देखील वासून करण्यात आला.

पुन्हा एकदा शॅकसाठी १५ मीटरची जागा मोजून देण्यात आली तसेच या अंतराबाहेर असलेल्या शॅकना हटवण्याचे आदेश जारी करण्यात आले आहेत. गोवा पोलिसांकडून वेगवेगळ्या किनाऱ्यांवर अशाच प्रकारे वेळोवेळी लक्ष ठेवले जाईल तसेच दिलेल्या आदेशांचे पालन न करणाऱ्यांवर कठोर कारवाई केली जाणार आहे.

समुद्राच्या भरतीच्यावेळी पाणी किनाऱ्यापर्यंत येतं, जे शॅकच्या बेड्सपर्यंत पोहोचतं आणि म्हणूनच सुरक्षिततेसाठी पोलिसांनी हा आदेश जारी केला होता. मात्र काही व्यावसायिक याचे अद्याप पालन करत नसल्याचे उघड झाले आहे आणि म्हणूनच पोलीस त्यांच्यावर करडी नजर ठेवतील.