Goa Beach Shacks: "शॅक्सना रात्री उशिरा मद्यविक्रीचे परवाने दिल्यानेच अडचणी वाढतायत" स्थानिकांकडून नियम कठोर करण्याची मागणी

म्हापसा: पर्यटनासाठी प्रिय असलेल्या गोव्यात सध्या शॅक्सवरून वाद सुरु आहेत. कळंगुट, मोरजी आणि मांद्रे किनाऱ्यांवरील शॅक्स रात्री १२ पर्यंत बंद झालेच पाहिजेत असे आदेश देण्यात आलेत. गोव्यातले स्थानिक शॅक्सना विरोध करतायत. शॅक नियमांचे उल्लंघन केल्याप्रकरणी गुन्हांमध्ये वाढ होत असल्याने पोलिसांनी शॅक्सवर कारवाई करावी अशी मागणी केली जातेय.

स्थानिकांच्या मते गोव्यात मालकांनी काही शॅक्स अशा लोकांना दिलेत ज्यांच्याजवळ हे शॅक्स चालवण्याचे परवाने देखील नाहीयत. कदाचित पोलिसांना याबद्दल माहिती देखील नसेल, मात्र स्थानिकांच्या मते यावर वेळीच कारवाई केली गेली पाहिजे. गोव्यातील शॅक व्यवसाय हे नियमांनुसार चालले पाहिजेत आणि म्हणून पोलिसांनी वेळीच कारवाई करणं महत्वाचं आहे, यामुळे गोव्याला भेट देणाऱ्या पर्यटकांना तसेच स्थानिकांना देखील त्रास होणार नाही.

स्थानिक म्हणतायत की शॅक्सचा खरा व्यवसाय हा किनाऱ्यांवर अन्न पदार्थ पुरवणे हा आहे मात्र सध्या यात भलतेच बदल झाले असून मालकांनी शॅक्सचं रूपांतर क्लबमध्ये केलंय. गोव्यातील अनेक किनाऱ्यांवर सनबेड्सची मक्तेदारी पाहायला मिळतेय.

स्थानिक म्हणतायत की अबकारी परवाने हे देखील फाईव्ह स्टार हॉटेल्स पुरते मर्यादित ठेवले पाहिजेत, कारण शॅक्ससह व्यावसायिक आस्थापनांना रात्री उशिरा मद्यविक्रीचे परवाने दिल्यानेच अडचणींमध्ये वाढ होतेय. यामुळे भलतेच पर्यटक गोव्याच्या दिशेने वळतात, ज्याचा पर्यटन क्षेत्राला फायदा होत नाही.

गोव्यातील पर्यटन सुधारावे आणि इथल्या पर्यटनाची खरी ओळख जपण्यासाठी नियमांची कठोर अंमलबजावणी करण्याची मागणी रहिवासी करत आहेत, स्थानिकांच्या मते सध्या सुरु असलेली परिस्थिती ही पर्यटन तसेच गोव्याच्या सामाजिक परिस्थितीला अनुकूल नाही.