Goa Budget Session: अधिवेशनाच्या पार्श्वभुमीवर पर्वरी, पणजी येथे जमावबंदी लागू

Goa Budget Session: गोव्यात अर्थसंकल्पीय अधिवेशनाला सोमवारी, 27 मार्चपासून सुरवात होत आहे. 27, 28, 29 आणि 31 तारखेपर्यंत हे अधिवेशन असणार आहे. त्या पार्श्वभुमीवर उत्तर गोव्याचे पोलिस अधीक्षक निधीन वाल्सन यांनी पर्वरी आणि पणजी परिसरात जमावबंदीचा आदेश जारी केला आहे. संपुर्ण अधिवेशनकाळासाठी हा आदेश लागू असणार आहे.

अधिवेशनाच्या पार्श्वभुमीवर काही आंदोलकांनी पणजी आणि पर्वरीत विविध विषयांबाबत आंदोलन छेडण्याचा निर्धार केला आहे. पण त्यातून राज्यातील कायदा आणि सुव्यवस्थेचा भंग होऊ शकतो. शांततेचा भंग होऊ शकतो.

त्यामुळे या काळात कुणाही व्यक्ती किंवा संस्थेला रस्त्यावर आंदोलन करता येणार नाही. चार पेक्षा अधिक व्यक्तींना एकत्र येण्यास मज्जाव असणार आहे.

विधानसभेच्या 500 मीटर अंतरात कुणालाही आंदोलन, मोर्चा, धरणे, सभा, मिरवणूक यावर बंदी असेल. त्यासाठी कलम 144 लागू करण्यात येत आहे, असे पोलिस अधीक्षकांनी याबाबतच्या नोटिशीत म्हटले आहे.